Apareixen nuevas brecas en as laderas de l’entibo de Yesa

As asociacions en contra d'o recreiximiento continan alarmando d'os movimientos de tierras y as grieus conseqüencias que podrían tener

Breca en a ladera de Yesa (Foto: Yesa + No)

Breca en a ladera de Yesa (Foto: Yesa + No)

Os movimientos de tierras en as laderas de l’entibo de Yesa continan, seguntes han denunciau as asociacions Yesa + No y Río Aragón. Ista vegada, en han apareixiu en o costau dreito, sobre as urbanizacions Lasaitasuna y El Mirador, en a muga superior d’o esbarizamiento que prencipió fa una anyada y que hue contina.

As brecas son de más de 100 metros de largaria y 2 metros d’amplo cullindo-ie una persona, como se puet viyer en as fotos que ninvían dende as organizacions d’oposición a lo recreiximiento de l’entibo.  L’asociación Yesa + No ha acusau a la CHE y a lo Gubierno de Navarra de “estar chugando con as personas, manipoliando y mentindo, prebando de transmitir una tranquilidat que no ye basada en a realidat”.

“As brecas son recients y no pas antigas, como diz lo Gubierno de Navarra”, dicen dende Yesa + No. “Antimás, en contra d’o que diz a CHE, no son a 1 km d’os grieus eslizamientos d’a ladera dreita ni tampoco no ye un puesto que se ha ubierto qualques vegadas en atros momentos anteriors: son en a carretera nacional por a on que por un regular se transitaba dica que la tallloron dimpués d’o desaloix de febrero (…). Dimpués estió parcheada y en chunio se i viyó a nueva breca”, adhiben.

A CHE podría fer tornar t’as casas suyas ta parti d’a chent que habió de desaloixar con os movimientos d’as laderas que bi habió fa bells pocos meses, “pero pasando a responsabilidat t’o Concello de Yesa”, informa Yesa + No, qui fa servir informes de que a ladera no ye estable agora ni en será nunca, como han anunciau bells cheologos dende fa meses.

Os opositors a lo recreiximiento consideran que o prochecto “se puede considerar ilegal, pues se podió aprebar basando-se en uns informes cheolochicos que han contrimostrau estar entivocaus, como poco”. Por ixo demandan o desembalse, y remeran que ista demanda ye compartida por os concellos de Sangüesa, Aibar, Gallipienzo y Gabarderal, antimás de o Parlamento navarro.

“En breus, prencipiará o desembalse forzau por os riegos auguas abaixo y no se ferá con as midas de seguridat que calen ta ista situación, podendo haber-ie grieus conseqüencias, pues l’esbruixallo de Plan d’Emerchencia sería inutil si calese fer una evacuación”, rematan alertando.

Breca en a ladera de Yesa (Foto: Yesa + No)

Breca en a ladera de Yesa (Foto: Yesa + No)

Una rispuesta a Apareixen nuevas brecas en as laderas de l’entibo de Yesa

  1. Pingback: Apareixen nuevos movimientos de tierra y mas brecas en as laderas de l’entibo de Yesa | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.