Aprebadas definitivament a ‘Lei Mordaza’ y a reforma d’o Codigo Penal

O Congreso espanyol apreba istas leis gracias a la mayoría absoluta d'o PP. Dende organismos internacionals advierten que as nuevas leis menazan o Estau democratico

Manifestación contra a "Lei Mordaza" en Madrit. Foto: Carlos Delgado (CC-BY-SA 4.0)

Manifestación contra a “Lei Mordaza” en Madrit. Foto: Carlos Delgado (CC-BY-SA 4.0)

O Congreso aprebó ahiere definitivament, con os solos votos a favor d’o Partiu Popular, a Lei de Seguridat Ciudadana, a reforma d’o Codigo Penal y o pacto antiterrorista. Todas dos normativas entrarán en vigor l’1 de chuliol.

Dende que estió anunciada por o ministro d’Interior, José Fernández Díaz, a Lei de Seguridat Ciudadana ha estau refusada por parte de colectivos socials y de churistas, que han visto en a normativa empentada dende o Partiu Popular una limitación d’os dreitos d’expresión y manifestación no admisibles en un Estau democratico. Amnistía Internacional, Rights International Spain y mas de 70 colectivos integraus en a plataforma No Somos Delito han denunciau o periglo que ista normativa suposa t’a democracia. A ells se i han sumau os relators especials d’a ONU, que s’han dirichiu a o Gubierno espanyol ta sinyalar as violacions d’os dreitos d’expresión y manifestación que derivarían d’a Lei de Seguridat Ciudadana y a reforma d’o Codigo Penal, y dica 35 catedraticos penalistas d’as universidatz espanyolas, que han sinyalau en un manifiesto que as reformas propuestas, “amás, beben politico-criminalment d’as piors fuents d’o sieglo XX, d’as corrients mas reaccionarias, mas autoritarias, d’aportacions en suma que han estau por totz denostadas”.

En o suyo paso por o Senau, s’han presentau 225 esmiendas a la Lei de Seguridat Ciudadana. Manimenos, en a suya aprebación en ista Camara, o pasau 12 de marzo, solament s’ha admitiu qualques esmiendas, a mayoría d’ellas presentadas por o Partiu Popular. Una d’ellas ye sobre a disposición adicional sobre as devolucions en calient, un texto que, de vez, estió introduciu a la fin d’o texto d’o prochecto de lei o zaguer día de presentación d’esmiendas en o Congreso. A esmienda aprebada sobre ista disposición en o Senau diz que as devolucions en calient se realizarán “respectando” a normativa de dreitos humanos, tot y que o concepto de refuse en buega viola o convenio de Viena sobre refuchiaus politicos. O ministro d’Interior, Fernández Díaz, ha sinyalau en o Congreso que as devolucions en calient se vienen practicando dende 2005, encara que sin cobertura legal.

Unatra rebaixa os plazos de prescripción d’as infraccions a seis meses, un anyo y dos anyos seguntes istas sían lieus, grieus u muit grieus.

Reforma d’o Codigo Penal

L’atra normativa aprebada definitivament ahiere ye a reforma d’o Codigo Penal presentada por o exministro de Chusticia, Alberto Ruiz-Gallardón, en setiembre de 2013 y a relativa a o Pacto Antiterrorista. A reforma d’o Codigo Penal contempla una serie de modificacions pactadas entre o PSOE y o Partiu Popular dimpués d’a trachedia de Charlie Hebdo. Entre atras, a cadena perpetua -denominada en o texto prisión permanent revisable– ta delitos de terrorismo con victimas mortals y l’aumento d’a pena maxima de garchola ta delitos d’enaltecimiento de terrorismo dica os 3 anyos, con o que as personas condenadas por iste delito podrían ir dreitament a la garchola encara sin tener antecedents penals. Tamién incluye como delito o “adiestramiento pasivo”, en referencia a la visita de pachinas web yihadistas.

A reforma d’o Codigo Penal suposa que o 40% d’os comportamientos que antes se consideraban faltas agora pasarán a estar delito. L’atro 60% d’as faltas pasarán agora a estar consideradas infraccions, replegadas en a nueva Lei de Seguridat Ciudadana, que a suya tramitación administrativa habrá d’acotolar ixa vía y acudir a una churisdicción menos garantista. Tanto a Lei de Seguridat Ciudadana como o nuevo Codigo Penal contemplan como infraccions con importants pinyoras, u delitos, accions relacionadas con a protesta social, muitas d’ellas popularizadas dende o 15M, como a ocupación d’entidatz bancarias u as manifestacions frent a o Congreso u parlamentos autonomicos.

O Partiu Popular ha estau l’unico en esfender en o Congreso a entrada en vigor d’a pena de prisión permanent revisable, a la quala han tachau de mida “moderna” que tracta de privar “richideces” y responde a os “problemas” d’as personas. Un hemiciclo meyo vuedo ha asistiu a un debat en que o PP ha esfendiu que a cadena perpetua se tracta d’una mida emparada por dos tercios d’a sociedat, un emparo que ha estau meso en dubda por l’Asociación Pro Dreitos Humanos d’Andalucía (APDHA). Ista organización ha realizau una enqüesta en que s’explanican as condicions d’o sistema penal, y en que s’amuestra que, facilitando qualques elementos d’información, sobre o coste de mantener en prisión permanent a una persona, os enqüestaus cambean a suya opinión sobre ista mida.

Compromís de derogación

Dende o PSOE han afirmau en o Congreso, en referencia a la Lei de Seguridat Ciudadana, que “la derogaremos mas luego que tarde”. No Somos Delito convocó en febrero un acto en que convidó a partius politicos a comprometer-se formalment con a derogación d’a Lei de Seguridat Ciudadana. A l’acto, que inicialment iba a tener puesto en o Congreso a instancias d’o PSOE, finalment habió de celebrar-se en o Cerclo de Bellas Artes. Ezquierda Unida, Amaiur, Esquerra Republicana, Equo-Compromís, PNV, Podemos y BNG s’adhirioron a o compromís de derogación, mientres que o PSOE no se tornó a pronunciar. O Partiu Popular, CiU y UPyD se negoron a sinyar o compromís.

Dende No Somos Delito han iniciau una campanya ta replegar sinyaturas y mensaches en contra d’a Lei de Seguridat Ciudadana y d’a reforma d’o Codigo Penal que serán exhibidas por medio d’hologramas. Tamién han convocau un acto, hue en o Congreso, en que i participarán diversos colectivos ta amostrar o suyo refuse a las nuevas leis aprebadas. Mientres l’acto se leyerá tamién o comunicau de Nacions Unidas en que exposa a suya oposición a la nueva lechislación espanyola. O pasau 23 de febrero, quantos relators especials d’o Consello de Dreitos Humanos d’a ONU se dirichioron a o Gubierno espanyol ta amostrar o suyo refuse frontal debant d’a Lei de Seguridat Ciudadana, tocant a las limitacions d’os dreitos d’expresión y reunión, y tamién sobre as reformas d’o Codigo Penal por o que fa a delitos relacionaus con terrorismo. Os ninviaus d’a ONU afirmoron que istas reformas lechislativas “menazan con violar dreitos y libertatz fundamentals d’os individuos”.

Fuent: https://www.diagonalperiodico.net/libertades/26208-aprobacion-definitiva-la-ley-seguridad-ciudadana-y-la-reforma-del-codigo-penal.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.