Aprebau l’abantprochecto de Lei sobre Trafico, Circulación de Vehíclos a Motor y Seguridat Vial

S'obligará a os menors d'edat a portar siempre casco en bicicleta y a os piatons se les obligará a fer test d'alcohol y/u drogas en fer una infracción de trafico

AR_JorgeFrez_01_tn496x329

O ministro de l’Interior Jorge Fernández Díaz explanica a reforma. Foto: Gubierno d’Espanya (http://www.lamoncloa.gob.es)

O Consello de Ministros ha aprebau hue l’abantprochecto de Lei sobre Trafico, Circulación de Vehíclos a Motor y Seguridat Vial. Entre as midas, s’obliga a os menors d’edat a portar casco quan vaigan en bicicleta en vías urbanas. En vías interurbanas continará a obligación de portar-lo pa totz os usuarios. Agora que, a obligación de portar-lo os adultos, se prenerá en un debat con expertos en a Comisión de Seguridat Vial d’o Congreso d’os Diputaus en agüerro, regulando-se en o futuro Reglamento Cheneral de Circulación.

En o mundo ciclista un zarpau d’asociacions y usuarios estatals y europeus presionoron pa que s’evitase de prener ista mida que consideran perchudicial pa la seguridat d’as ciclistas pues denuncioron con datos y estudios que diminuirá a suya presencia en as carreras y ferá mas frachils a os usuarios y usuarias d’a bicicleta. Conbici tampoco no veye bien a nueva modificación.

Se’n puyarán as pinyoras por conducción con l’alcohol u drogas en l’organismo de 500 a 1.000 €, se detectará drogas en l’organismo mediant un test de saliva y os piatons serán obligaus a pasar o test d’alcohol y/u drogas quan cometan una infracción de trafico, no nomás quan sigan embrecaus en un accident. Qualsiquier usuario d’a vía puede estar pinyorau por ista causa en estar embrecau en un accident u en negar-se a sozmeter-se a las prebas.

As velocidatz maximas y minimas no cambearán con a lei, pero ista estableixe que será o futuro Reglamento Cheneral de Circulación qui las fixe, tanto pa las vías como pa los diferents conductors y vehíclos. Se viedan, asinas mesmo, os detectors de radars, conlevando perda de puntos.

O futuro Reglamento decidirá si vieda a os menors d’ocupar os posientos de debant u de dezaga en os vehíclos pendendo d’a suya grandaria.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.