Aprebau l’ixample d’a Reserva d’a Biosfera “Ordesa–Comachibosa”

A UNESCO apreba l'xample d'ista Reserva d'a Biosfera, que pasa de 51.396 hectarias a 117.364

2013-05-30_ordesa-vinamala2

Foto: Gubierno d’Aragón

O Consello Internacional de Coordinación d’o Programa sobre l’Hombre y a Biosfera (MAB) d’a UNESCO, ha aprebau l’ixample d’a Reserva d’a Biosfera “Ordesa-Comachibosa”. Ista actuación suposa ixamplar ista aria protechida en mas de 65.000 hectarias, pasando de 51.396 hectarias actuals a 117.364.

A decisión d’estendillar ista reserva, que os suyos orichens se remontan a 1977, suposa a incorporación de quatro nuevos municipios de forma voluntaria: Broto, Tella-Sin, Puertolas y Bielsa, englobando dentro d’as mugas tot o conchunto d’o Parque Nacional d’Ordesa y d’As Tres Serols, que sería a “Zona Nuclio” d’a Reserva de conchunta con os Monumentos Naturals d’as Cheleras Pirinencas. A Reserva d’a Biosfera incluirá en o suyo interior, por una parte, os nuclios de población habitaus mas significativos d’as vals de Tena y de l’Alto Ara como modelos d’o desembolique sostenible.

O director cheneral de Conservación d’o Medio Natural, Pablo Munilla, subrayó que “iste ixample ye muit positivo t’o parque nacional d’Ordesa, por estar l’epicentro, amás t’os municipios aragoneses que son en l’entorno”. Munilla tamién destacó que “os autenticos protagonistas de l’ixample d’a reserva son os concellos que forman parte d’iste prochecto y que se i han sumau de traza voluntaria”.

Amás d’aprebar iste ixample, iste consello adhibió 11 nuevos puestos a o Ret Mundial de Reservas de Biosfera, que d’ista traza cuenta con 621 puestos repartius por 117 países.

Una proposa con historia

O Departamento d’Agricultura, Ganadería y Medio Ambient d’o Gubierno d’Aragón presentó o setiembre pasau en Madrit, debant d’o Comité Espanyol MAB (Hombre y Biosfera) d’a UNESCO, a proposa d’ixample y millora en a chestión d’a Reserva d’a Biosfera “Ordesa-Comachibosa”.

Dimpués de quantos timidos intentos por parte d’anteriors executivos d’o Gubierno d’Aragón en iste sentiu, l’actual proposa, muito mas angluciosa y completa, estió elaborada conchuntament con as administracions locals d’a zona y o departamento d’Agricultura, Ganadería y Medio Ambient. Contaba con o visto bueno previo d’o Comité Scientifico Espanyol d’as Reservas d’a Biosfera y d’as entidatz locals i embrecadas, adaptando-se a os criterios que s’establioron en l’anyo 1995 en a clamada “Estratechia de Sevilla”, a on s’incorpororon nuevos aspectos de cara a guaranciar a conservación d’a diversidat biolochica y cultural d’a zona, y a planteyar un modelo d’ordinación d’o territorio en o qual sía posible o concepto d’o desembolique sostenible. Finalment, ista proposa, recibió l’aprebación d’o Comité, convertindo-se asinas en a segunda de toda Espanya.

A Reserva d’a Biosfera Ordesa-Comachibosa

A Reserva “Ordesa-Comachibosa” ye una muestra excepcional d’o fenomeno d’as cheleras que ha modelau o relieve dando puesto a profundas vals con perfil en forma d’U, circos y lagos excavaus por os chelos. En a reserva se pueden trobar tucas superiors a os 3.000 metros, tanto graniticos como calizas. A diversidat floristica ye altisma, incluindo-ie mas de 2.000 especies inventariadas.

Creyada en 1977, actualment poseye 51.396 hectarias, distribuidas por os municipios de Biescas, Fanlo, Foz de Chaca, Pandicosa, Sallent de Galligo, Torla y Yesero, incorporando terrenos de l’antigo Parque Nacional d’a Val d’Ordesa y d’a Reserva d’a Caza de Comachibosa. A nueva reserva pasará a tener 117.364 hectarias, y bi incorporará mas territorio d’os municipios ya embrecaus, y tamién de quatro nuevos: Broto, Tella-Sin, Puertolas y Bielsa.

D’ista traza, a Reserva d’a Biosfera se convierte en una d’as millors representacions d’os ecosistemas de montanya d’o Pirineu, y en concreto d’os sistemas naturals ligaus a formacions d’erosión y cheleras, y extensas formacions vechetals de singular valor. Asinas mesmo, acubilla especies de flora y fauna singulars dentro d’o contexto rechional y internacional, muitas d’ellas con bell grau de menaza, que a suya conservación ye fundamental t’o mantenimiento d’a diversidat biolochica.

Entre os paisaches destacan os propios d’alta montanya, con imponents cheleras y formacions provocadas por a erosión chelera, selvas mixtas caducifolias, pinars de pin negro, abeteras, estivas, etc., y especies d’alta valor como o cluixiuesos, o sarrio, o desmán d’os Pirineus, a perdiz nival, l’urogallo u o pito negro, y entre as especies de flora, arbols como o pin negro, l’abet blanco, taixos, abetoches, etc., y especies de menor porte como a flor de nieu u o zapatito de reina.

As Reservas de Biosfera son zonas d’ecosistemas terrestres, costers u marinos, u una combinación d’istos, que han estau reconoixidas internacionalment como tals en o marco d’o Programa sobre l’Hombre y a Biosfera (MAB) d’a UNESCO. Se las ha creyau ta promover y demostrar una relación equilibrada entre os seres humans y a biosfera.

“Ordesa-Comachibasa” forma parte d’o Ret Mundial de Reservas d’a Biosfera d’a UNESCO, con 40 espacios repartius por quince comunidatz autonomas espanyolas, estando cinco d’ells islas completas.

Fuent: http://www.cronicadearagon.es/wordpress/?p=41425

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.