Aprebaus os presupuestos d’o gubierno ta iste anyo 2012

As Cortz nomás han aprebau 41 enmiendas d'as 1471 presentadas por as collas parlamentarias

20 Febrero, 2012 | Economía | Autor: Arredol | Tweet

Pleno d'as Cortz

Dimpués d’estar retiraus por a marcha d’o Conseller d’Economia ta o gubierno espanyol, os presupuestos de 2012 han sido aprebaus en pleno de Cortz. Os nuevos presupuestos baixan un 2,56% d’os de l’anyo 2011 y contemplan un gasto de 5328 millons d’euros. En istos nuevos presupuestos, aprebaus por a mayoría que conforman en o gubierno PP y PAR, priman as politicas socials y o fomento d’emplego con creiximientos en materia de sanidat; prestacions asistencials y servicios; politicas d’emplego y rilacions laborals; u agricultura y fomento agroalimentario, seguntes o gubierno, que s’ha marcau como obchectivos en istas cuentas saniar as finanzas publicas y cumplir l’obchectivo d’estabilidat presupuestaria, zifrau en un 1,3% d’o PIB.

D’as 1473 enmiendas que s’han presentau nomás que 41 han estau aprebadas, lo que ha prevocau as creticas d’a oposición por a manca de flexibilidat d’o gubierno de coalición.Seguntes os voceros de PSOE, CHA y IU istas cuentas no servirán ta reencetar a economía amás que presentan importants retalladas en acción social, educación y fomento de l’emplego, tot o contrario d’o que esfiende l’Executivo de Luisa Fernanda Rudi.