Apudepa aconsigue ‘un rechimen immediato y provisional de protección’ pa Averly

Ha empecipiau o expedient pa que l'antiga fabrica zaragozana Averly siga declarada Bien d'Intrés Cultural

Fundición Averly (Foto: Gozarte)

Fundición Averly (Foto: Gozarte)

Apudepa ha comunicau que o expedient pa la catalogación d’Averly ha estau iniciau, con o que prencipia a rechir en a fabrica o rechimen de protección d’os Biens d’Intrés Cultural. Se tracta d’o tramite imprescindible pa la declaración de Bien d’Intrés Cultural, por o que Apudepa amuestra a suya satisfacción por a mida y aspera que derive luego en a catalogación definitiva.

L’Asociación d’Acción Publica pa la Defensa d’o Patrimonio Aragonés -Apudepa-, comunica que o expedient pa la declaración d’Averly como Bien d’Intrés Cultural -BIC- ha estau incoau seguntes lo disposau por o punto 2 de l’articlo 18 d’a Lei d’o Patrimonio Cultural Aragonés que estableixe que “quan, habendo-se presentau solicitut d’incoación d’expedient, no s’haiga produciu en o plazo de tres meses, s’entenderá empecipiau tal expedient”. Apudepa presentó a solicitut oficial pa la declaración d’Averly como Bien d’Intrés Cultural o pasau 11 d’abril, por o que, pasaus os tres meses estipulaus por a Lei, o expedient se considera incoau.

No se tracta d’una qüestión formal sino, a o contrario, de gran importancia pa la protección d’a fabrica, pus o punto 2 de l’articlo 19 d’a Lei especifica que “a incoación d’o expedient implica l’aplicación immediata y provisional d’o rechimen de protección establiu, seguntes os casos, pa os Biens d’Intrés Cultural y Conchuntos d’Intrés Cultural”. Amás, a incoación d’o expedient implica tamién “a suspensión d’as licencias municipals relativas a toda mena d’obras u actividatz en a zona afectada”. A totz os efectos d’a Lei de Patrimonio Cultural, Averly poseye agora, mientres no se produzca un pronunciamiento expreso d’a Diputación Cheneral d’Aragón en sentiu contrario, a protección d’os Biens d’Intrés Cultural, que s’estendillará por un plazo minimo de 18 meses.

Apudepa valora positivament ista noticia y pide a la Diputación Cheneral d’Aragón que adopte antes con antes o trango definitivo y, a la luz d’os informes aportaus, culmine o expedient prencipiau y declare Averly Bien d’Intrés Cultural en a figura de Conchunto Historico.

Fuent: http://arainfo.org/2013/08/apudepa-consigue-un-regimen-inmediato-y-provisional-de-proteccion-para-averly/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.