Apudepa creye que “han fallau os mecanismos de control” en l’esvoldregue d’a muralla zaragozana

Demanda a lo concello un chequeo urchent d'a muralla y un plan de mantenimiento y conservación

A muralla o chueves de tardis

A muralla o chueves de tardis

APUDEPA (Asociación d’Acción Publica t’a Esfensa d’o Patrimonio Aragonés) ye consternada por l’espalde que bi habió iste chueves de bells 30 metros d’a muralla meyeval de Zaragoza. Ta ista asociación “a ciudat ha perdiu buena parti d’uns d’os radius repuis de l’elemento que l’ha dau forma y muga mientres muitos sieglos. Ye una graniza perda que a los aimants d’o patrimonio nos imple de dolor y pena.” Pero tamién s’han amostrau carranyaus, porque “l’analís d’os feitos fa pensar que, de nuevas, han fallau os más elementals mecanismos de control y de tutela d’o patrimonio cultural aragonés”. A muralla de Zaragoza, remeran, ye catalogada como Bien d’Intrés Cultural, a mas gran categoría de protección en l’estau.

Seguntes ha puesto saber Apudepa, l’asociación de vecins Parque Bruil – Sant Agostín, heba avisau bellas vegadas a lo Concello d’o risque de que s’espaldase ixa parti d’a muralla. Tanto en a chunta de distrito como en escritos oficials en mayo y chunio de 2012 y a primers de 2013. A tamás d’istos avisos, o concello no actuó d’urchencia, lo que talment haiga causau que s’espalde a muralla. Apudepa creye que lo Concello “ha d’aclarir que falló en a cadena tecnica y administrativa y porque se falló tanto en o diagnostico.”

T’Apudepa, ye preocupant a falta de priorización en o Plan Especial d’a Muralla, y lo primer de tot habría d’estar a conservación d’os repuis. D’atra man, ta ista asociación tamién truca lo ficacio que “s’haiga gastau diners en esviellar sin que calese l’entorno d’as murallas romanas, entre que se deixaba ta más entabant una actuación tan urchent en la meyeval.” Apudepa sospeita que “as intervencions executadas dica agora son estadas más cosmeticas que no pas estructurals” y demanda un chequeo urchent d’a muralla y un plan de mantenimiento y conservación.

“As conseqüencias de no ascuitar a los ciudadans son penibles” remata Adpudepa, remerando que muitos atros edificios de Zaragoza son seriament menazaus.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.