APUDEPA critica l’estau d’o patrimonio cultural aragonés

"O patrimonio cultural ye un gran Ecce Homo", dicen

Ecce homoO zancocho feito en a «restauración» d’a pintura de l’Ecce Homo de Borcha ha provocau arrienda de reaccions en tot Aragón y dillá. Dende a mofla dica as criticas contra a muller que lo fació u contra l’estau de conservación de tot lo patrimonio cultural aragonés. D’ista zaguer opinión ye APUDEPA (Asociación Publica t’a Esfensa d’o Patrimonio Aragonés) qui han feito publico un comunicau a on que dicen que o nuestro patrimonio cultural «ye un gran Ecce Homo», en referencia a la pintura  d’Elías García.

De feito, Apudepa creye que «lo que ha pasau con l’Ecce Homo de Borcha» ye d’os mals menos trascendents que ha sufriu en istas anyadas o patrimonio cultural aragonés» y demandan un «chiro copernicano» en as «politicas de patrimonio aplicadas por o conchunto de l’administración aragonesa».

Ta contrimostrar-lo Apudepa remera toda mena de feitos que han pasau en as zaguers anyadas, como l’esboldregue d’a espelunga de Chaves con o chacimiento neolitico más important d’a peninsula, o caso d’o castiello meyebal de Venta de Ballerías, a perda de pinturas murals romanicas y mosaicos romanos,  l’estau d’o molín de Sant Pietro en Albarrazín y asinas asinas. Por ixo se queixan de que s’haiga dau más treslada en os  meyos de comunicación a una error d’una muller que a los chandríos feitos por l’administración y as grans interpresas. «En a mesma Borcha»- dicen- «s’ha destruyiu una d’as suyas millors arquitecturas civils, a casa de Sant Bartolomé».

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.