Apudepa protesta por l’escomencipie d’o esvoldregue d’a casa de Sant Pietro lo Viello de Uesca

Apudepa creye que o Concello de Uesca contrimuestra o poco respeto que tien por o patrimonio y o cumplimiento d'a lei.

Sant Pietro lo VIello, en Uesca (Foto: Wikipedia)

Sant Pietro lo VIello, en Uesca (Foto: Wikipedia)

Apudepa ha denunciau o prencipio d’o esvoldregue d’a casa d’o redol d’a Plaza de Sant Pietro en Uesca, que ye protechida por diferents catalogacions. En conoixer-se o escomencipie d’os treballos, ista asociación s’ha meso en contacto con o concello de Uesca y con a Dirección Cheneral de Patrimonio Cultural qui, seguntes Apudepa, han reconoixiu que os treballos no tienen l’autorización d’a Comisión Provincial de patrimonio, incumplindo asinas a Lei de Patrimonio Cultural Aragonés. Una atra vegada, Apudepa ha demandanu que s’aturasen as obras de camín.

“O edificio que se ye fendo esvoldregar ye un d’os más intresants eixemplos de l’arquitectura popular uescana“, explican dende l’asociación. Arquitectura que conta con pocos eixemplos debiu a lo “maltracto sistematico que ha sufriu en as zaguers decadas o patrimonio arquitectonico de Uesca. O edificio ye catalogau en estar aintro d’o Conchunto d’Intrés Cultural d’a Ciudat de Uesca, en fer parti d’o entorno de protección d’o Bien d’Intrés Cultural de Sant Pietro lo Viello y en estar aintro d’o Catalogo d’Edificios d’Intrés d’o Plan Cheneral d’Ordenación Urbana.

L’Asociación, manimenos, reconoixe que cal guarenciar a seguridat d’as personas, debiu a que o Concello diz que se fa esvoldregar por ixe motivo. Como solución proposa una bastida d’a casa, de traza que se puedan prener as decisions que calgan ta conservar o edificio fendo servir os instrumentos que ta ixo mete a Lei Urbanistica. O edificio ye parti d’o conchunto BIC d’a ciudat “por lo que ta fer-ie qualsiquier obra cal que lo autorice a Comisión de Patrimonio, sin que i culla excusas ni autorizacions verbals”, dicen dende Apudepa.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.