Aragón incluye l’aragonés y o catalán como lenguas vehiculars en o curriculo de Primaria

L'aragonés y o catalán d'Aragón tienen caracter de materias curriculars dentro d'a reincorporada aria de Lenguas Propias d'Aragón

Clase d'aragonés en o CRA Cinca-Cinqueta

Clase d’aragonés en o CRA Cinca-Cinqueta

O Gubierno d’Aragón ha emitiu o curriculo d’Educación Primaria con qualques novedatz que chenerarán significativas dosis de polemica. Sobre tot a que se refiere a la inclusión de l’aragonés y o catalán d’Aragón como materias de caracter curricular. Todas dos se consideran vehiculars y formarán parte d’a reincorporada aria de Lenguas Propias d’Aragón.

L’obchectivo, apuntan dende o Executivo, ye fomentar, en as zonas d’utilización predominant, o suyo aprendizache”. Tamién s’adhiben a o curriculo contenius relacionaus con Aragón, “con especial incidencia en l’asignatura de Sciencias Socials, que se vincla muito mas a o territorio y realidat aragonesa pa que os alumnos conoixcan y sían mas familiarizaus con o entorno en que viven, o suyo patrimonio natural, social y cultural, dentro d’un contexto global”.

Seguntes un estudeo presentau en mayo de 2015 por o Seminario Aragonés de Sociolingüistica, 83.199 personas en Aragón (6,2 %) entienden o catalán; o 4,2 % lo sabe charrar; o 4,4 % leyer, y o 2 % escribir. Respective a l’aragonés, lo comprenden 44.439 personas (3,3 %); lo sabe charrar l’1,9 % d’a población; lo leye o 2,3 %, y l’escribe l’1,3 %. Por tanto, en cifras globals, o 9,6 % (127.639 personas), entienden o catalán u l’aragonés.

Dentro d’as comarcas d’A Francha, a d’o Matarranya ye a que tien un mayor porcentache (66,2 %) d’habitadors que comprenden una (u todas dos) d’as lenguas. Por dezaga amaneixe a Comarca d’o Baixo Cinca, a Litera y a Ribagorza.

S’especifica, por anyadedura, un dato destacable: una tercera parte d’os fablants d’aragonés (8.618 personas), y una quatrena parte d’os que usan o catalán (13.711 personas), residen en a Mancomunidat de Zaragoza, sobre tot, en a capital aragonesa.

Atras novedatz d’o currículo de Primaria

Beluns d’os aspectos novedosos d’o curriculo son o establimiento, por primer vez, d’un periodo de tutoría obligatorio pa totz os cursos d’a etapa de Primaria. Tamién se potencian os criterios d’evaluación como referent fundamental y se minimizan os estandars d’aprendizache evaluables.

D’igual forma, apuntan dende o Gubierno aragonés, se pretende de dar mas valor a la Educación Fisica y, pa ixo, s’estatuye una carga horaria minima de 3 horas semanals entre 1º y 4º de Primaria, y un minimo de 2 horas y 15 minutos en 5º y 6º. Dando asinas respuesta, argumentan, a las recomendacions d’a Organización Mundial d’a Salut (OMS) y a l’informe Eurydice Report (2013).

As ensinyanzas artisticas tamién salen bien posicionadas, pues tendrán una carga lectiva minima de dos horas semanals. Iste empento, apuntan, “s’empara en estudeos que subrayan os beneficios individuals y socials d’una educación creyativa y as alportacions que un curriculo con un important component artistico tienen en l’alumnau”.

Óscar F. Civieta pa ElDiario.es Aragón.

Fuent: http://www.eldiario.es/aragon/sociedad/Aragon-aragones-vehiculares-curriculo-Primaria_0_551195306.html

Una rispuesta a Aragón incluye l’aragonés y o catalán como lenguas vehiculars en o curriculo de Primaria

  1. Pingback: Aragón incluye el aragonés y el catalán como lenguas vehiculares en el currículo de primaria [an]

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.