Aragón prepara un plan ta acullir a refuchiaus sirios y o suyo president clama “agarrau y miserable” a Rajoy

A consellera de Servicios Socials ha sinyalau que ya ha empecipiau a creyación d'un ret de familias acullideras

Javier Lambán en foto d'archivo. Foto: Gubierno d'Aragón

Javier Lambán en foto d’archivo. Foto: Gubierno d’Aragón

O Gubierno d’Aragón se suma de traza oficial a las muitas administracions que han amostrau a suya disponibilidat ta acullir a refuchiaus sirios. L’ha anunciau o suyo president, Javier Lambán, en un acto celebrau hue en Madrit.

O maximo mandatario de l’Executivo aragonés ha aprofitau ta criticar l’actitut d’o president d’Espanya. Lambán ha dito que Rajoy “ha teniu a dubdosa honor d’estar o president mas cicatero, agarrau y miserable a la hora d’acullir refuchiaus”. As respuestas a os problemas d’ista naturaleza, ha sinyalau, “no pueden basar-se en criterios economicos, sino solament morals”.

Ta ell, Rajoy ha estau muit por baixo d’a “estatura moral d’a sociedat espanyola y aragonesa”. Aragón, “que siempre ha estau una Comunidat solidaria, no se va a quedar dezaga a la hora d’expresar y fer efectiva a solidaridat dende l’ambito privau, municipal y autonomico”, ha apuntau.

A consellera de Ciudadanía y Servicios Socials, María Victoria Broto, ha estau a encargada de desvelar as linias mayestras d’iste plan. Aragón, ha afirmau, “ubrirá as suyas puertas a totz aquells refuchiaus que l’amenistan”, por ixo, ya ha empecipiau a creyar-se “un ret de familias acullideras”.

Tamién o consellero de Sanidat, Sebastián Celaya, ha sinyalau que a intención de l’Administración aragonesa ye “fer tot o que faiga falta ta que istas personas sían atendidas o millor posible, ya que ye un tema de dignidat humana”. O sistema de salut d’Aragón, ha concluiu, “tiene capacidat ta atender a qui o Gubierno decida que han de venir aquí”.

Fuent: http://www.eldiario.es/aragon/politica/Aragon-refugiados-presidente-miserable-Rajoy_0_427307753.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.