Aragón sale t’a carrera en o 1º de mayo

Aragón exiche a libertat d'as personas detenidas dimpués d'o 29M y camina ent'a vada cheneral.

Manifestación Zaragoza. (Foto: http://primo.com.es/)

O primer de mayo ye una commemoración de quan fa 125 anyos a clase treballadera estió reprimida  con l’achusticiamiento d’una colla d’obrers de Chicago que luitaban por a chornada de ueito horas. Iste mensache ha estau la nota dominant en os manifiestos, declaracions y expresions d’os sindicatos d’Aragón y de tot aquell que s’ha quiesto sumar a las manifestacions a lo largo d’a chornada.

 

Teruel

Arredol de 200 personas han secundau a manifestación d’o Bloque Critico de Teruel, empentau por as organizacions sindicals CNT, STEA-i, y emparada por l’Asambleya d’Estudiants, Ecolochistas en Acción y Purna.

Mientras o recorriu s’ha denunciau a campanya de criminalización contra la mobilización social y s’ha exichiu a libertat d’as personas detenidas dimpués d’a Vada d’o 29-M. Destacaban os chilos a favor d’una nueva Vada Cheneral y contra ista Reforma Laboral y o pacto social.

Tamién s’ha comentau a chura de bandera organizada por l’Exercito o domingo 6 en a Plaza d’o Seminario. “Especialment vergüenyoso consideramos iste acto ya que os gastos militars tasament han baixau en comparanza a la Sanidat u a Educación” denunciaban dende o Bloque Critico . Mientras toda a chornada s’ha informau sobre a campanya de desobediencia fiscal en a renta de 2012.

Dimpués d’a manifestación y o manifiesto s’ha puyau a os Pozos de Caudé. “Dimpués de depositar unas flors en o monumento d’a CNT s’ha recordau que o millor homenache t’os nuestros companyers asasinaus en o 36 ye continar a luita” sinyalaban dende o Bloque Critico.

 

Uesca

Convocadas por os sindicatos CNT, CGT, SOA y HUSTE, y con l’emparo d’Ecolochistas en Acción, mas de meyo milar de personas baixo o lema “Brenca que negociar, ni reforma laboral, ni pacto social”, han partiu, pasada a una d’o meyo día, d’a plaza de Navarra d’a capital altoaragonesa ta recorrer o centrico Coso uescano y plegar en a carrera d’o Santo Grial. As y os asistents han proferiu chilos contra as politicas neoliberals que, naixidas d’o bipartidismo, s’han concretau ya en dos reformas laborals, profundas politicas de retalles y dos vadas chenerals en totz dos zaguers anyos. Tamién s’ha animau a continar con la luita en a carrera confitando en a creixent mobilización social.

Curiosa ha estau a scena a la fin d’o recorriu quan, con l’eco de “el pueblo unido jamás será vencido”, a menos de cinquanta metros encara quedaban numerosas restas d’a manifestación d’as grans centrals sindicals, y no han estau pocas as personas que amostraban a suya estupefacción por a situación, “con a que ye cayendo” afirmaban. Talment sía ista fartera o que ha permitiu que se deixasen veyer sinyals y pegallos de bells partius como IU u o propio PCE que, en primeras, pareixerían mas afíns a atros sindicatos.

Curiosa ha estau tamién a argüellosa presencia en a manifestación d’os sindicatos mayoritarios de cargos relevants dentro d’o PSOE como Marcelino Iglesias, “confirmando una vez mas por un costau a inchenuidat y tasa memoria historica de bellas organizacions sindicals, que amuestran bella simpatía con istas presencias y, por unatro costau, o taso pudor que tienen bells partius ta deixar-se veyer tranquilament en a carrera una vez han perdiu o sillón”, apuntan dende The North Fate.

L’acto ha rematau con a intervención de representants de cadaguna d’as organizacions convocants.

 

Zaragoza

A hora pactada, as 12;  o puesto Glorieta Sasera. Puntuals a la cita unas 4000 personas, como si d’una ola multicolor de sinyals, lemas y canticos se tractase, han recorriu unas carreras poco habituadas a istes menisters. CATA, CGT, CNT, Intersindical d’Aragón y SOA s’han visto obligaus a un itinerario poco común a causa d’as obras d’o tramvía, pero que ha serviu igualment de scenario an reivindicar os dreitos d’a clase treballadera, o reparto d’a riqueza y un cambeo en o modelo de sociedat.

Iste anyo ha teniu una carga adicional de reivindicación: a fin d’a politica represiva y a immediata puesta en libertat de todas as personas que se troban actualment detenidas. Una pancarta unitaria de “Libertat detenius. No + represión” lo deixaba bien platero. A memoria ta Laura y a resta d’activistas que actualment continan en prisión, ha marcau a chornada.

Manifestación Zaragoza. (Foto: http://primo.com.es/)

Fuent: http://arainfo.org/2012/05/aragon-exige-la-libertad-de-las-personas-detenidas-tras-el-29m-y-camina-hacia-la-huelga-general/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.