Aragón se para pa incorporar o gribau de cancer colorrectal y de cervix a la cartera basica de servicios sanitarios

O consellero aragonés de Sanidat asegura que “o gribau d'o cancer de peito yera, ye y será"

2013-07-24_cancer-colorrectal-cervix2

Foto: Gubierno d’Aragón

O consellero de Sanidat, Bienestar Social y Familia d’o Gubierno d’Aragón asistió ahiere a la reunión d’o Consello Interterritorial d’o Sistema Nacional de Salut (CISNS) en a quala, entre atras qüestions, se decidió d’incorporar a la cartera basica de servicios d’o Sistema Nacional de Salut os gribaus de cancer colorrectal y de cervix. “A inclusión d’o cancer de colon ye una proposa que fació o Gubierno d’Aragón y, a la marguin que s’incluise u no en a cartera de servicios, en Aragón ya l’hemos instrumentau pa que prencipie en setiembre”, declaró.

Por o que fa a o cancer de peito, Oliván apuntó ahiere que s’ha reafirmau a inclusión d’iste gribau y aprofitó pa subrayar que “en Aragón o gribau d’o cancer de peito yera, ye y será”.

A la salida d’a reunión, o consellero aragonés ha informau que 1.262 mullers se sozmetioron, en 2012, a ciclos de fecundación in vitro u inseminacions artificials y aseguró que, en ista materia, ye partidario que se compachinen “os criterios medicos con a libertat d’orientación sexual d’os pacients”.

Os criterios comuns pa las Unidatz de Cudiaus Intensivos Pediatricas y Neonatals, tamién s’apreboron ahiere. Seguntes Ricardo Oliván, “isto suposará que, en istas unidatz, os pais podrán estar con o suyo fillo hespitalizau as 24 horas d’o día”.

O consellero de Sanidat, Bienestar Social y Familia tamién sinyaló que en a Interterritorial s’ha informau d’unas guidas, realizadas por profesionals, que contienen una serie de sucherencias pa optimizar determinaus servicios medicos como Otorrinolaringolochía, Traumatolochía y Ciruchía vascular. S’estableixe asinas protocolos en os quals se fixa o numero idonio de servicios por habitant, as camas u as intervencions minimas en un determinau centro hespitalario pa guaranciar a calidat y a seguranza d’o pacient. Amás, istas pautas, que habrán d’estar aprebadas dimpués d’un analís mas exhaustivo por parte d’as Comunidatz, son interesants, seguntes Oliván, pa “poder prener decisions d’organización a nivel sanitario”.

Pa rematar, atro d’os documentos presentaus entre a trobada estió l’informe sobre o Fondo de Guarancia Asistencial (FOGA) por o qual se pretende de compensar a las CCAA por o gasto sanitario que realizan ciudadanos d’atras comunidatz que acuden a istas como conseqüencia de desplazamientos temporals. En relación a isto, Ricardo Oliván sinyaló que en prencipio podría estar d’alcuerdo con ista mena de compensacions siempre que, en relación a Aragón, se pare cuenta en dos qüestions. “Por un costau, que o desplazamiento de ciudadanos d’Aragón enta zonas turisticas suposa, amás de l’asistencia sanitaria, o traslado de recursos economicos que revierten en a comunidat receptora. Y, por atro, que en o momento en que se realizoron as transferencias sanitarias, en o caso de Catalunya, a ista Comunidat ya se le computó a la población aragonesa d’as zonas buegants que atendeban en ixe momento” concluyó.

Fuent: http://www.cronicadearagon.es/wordpress/?p=42962

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.