Aragón, siede d’a plataforma d’información sobre pacients cronicos en Europa

O prochecto será realizau por l'Instituto Aragonés de Sciencias d'a Salut en colaboración con a Fundación ARAID

Foto: Gubierno d'Aragón

Foto: Gubierno d’Aragón

Hue tien puesto en o Ministerio de Sanidat, Servicios Socials y Igualdat a presentación de CHRODIS-JA, una linia d’acción europea relacionada con as malotías cronicas y a promoción de l’aviellamiento saludable. O suyo prencipal obchectivo ye promover y facilitar o proceso d’intercambio de conoixencia y de buenas practicas entre os países europeus participants en relación a la cronicidat, con especial atención en a promoción d’a salut y a prevención, a multimorbilidat (pacients con quantas malotías) y a diabetes.

Ista linia de treballo se trestalla en diferents prochectos, un d’os quals, coordinau por l’Instituto de Salut Carlos III, será liderau por Aragón y, concretament, por l’Instituto Aragonés de Sciencias d’a Salut en colaboración con a Fundación ARAID. A Plataforma ta l’Intercambio de Conoixencia (Platform for Knowledge Exchange – PKE), tien como misión servir de puesto de trobada en que os pacients, cudiadors, investigadors y, mesmo, os representants gubernamentals, podrán meter a la disposición d’a resta de participants as millors practicas emplegadas en Europa relacionadas con os cudiaus a enfermos cronicos.

PKE tendrá dos resultaus tanchibles. Por una parte, disposará d’una plataforma web que ferá honra de repositorio d’información. Iste repositorio se nutrirá d’as aportacions de totz os países europeus participants, no solament en relación a la cronicidat, sino tamién a os atros prochectos integraus dentro de CHRODIS-JA: diabetes, multimorbilidat y prevención, entre atros. Por atro costau, prencipiará o funcionamiento d’una oficina virtual u ventaneta unica a la que dirichir qualsiquier consulta que pueda surtir sobre malotías cronicas.

CHRODIS-JA mete en relación a 37 institucions de toda Europa y a 24 socios colaboradors, por o que Aragón, como lider d’un d’os prochectos integraus, se constituirá como referent en l’ambito d’o tractamiento d’a cronicidat basau en as buenas practicas y en a evidencia scientifica.

Fuent: http://www.cronicadearagon.es/wordpress/?p=47324

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.