Arandiga celebro a 12ena Trobada por a cultura aragonesa

A trobada se celebró o diya 1 de setiembre y contó con una gran afluyencia de publico.

Os mosicos estión os protagonistas d’a Chornada. En primer plano, os dulzainers de Profés Prou (Foto: Vicky M. C.)

L’Asociacion Cultural O Trinquete (ACOT) d’Arandiga celebro iste pasau cabo de semana una nueva edicion d’a suya ya tradicional Trobada por a Cultura Aragonesa. En ista 12ena edicion l’accento se meteba en a mosica tradicional y conto con una muit buena asistencia de publico mientres todas as actividatz que se i desembolicoron.

 

A devantadera d’a chornada estio a mans de La Casa del Gaitero d’Aguaron, que mena Eugenio Arnao, con un taller de construccion d’instrumentos de canya. Acompanyaba a iste taller una exposicion d’instrumentos mosicals de feitos d’iste material y replegaus por tot o mundo.

 

De tardes, y dimpues d’una chenta popular, un pasavillas recorrio as plazas y carreras d’o lugar con o soniu d’as donzainas d’as quatro collas participants. Todas quatro collas, plegadas de Valencia (collas La Llavor y Gaztara), Castiella (Gaiteros de La Sagra) y Aragon (Profes Prou) compartiban l’emplego d’iste instrumento tradicional. Continando en clau de mosica, y con a siede de l’asociacion a rebutir, un concierto d’as collas Azero (La Codonyera) y Tractores Agresivos (Ricla), que tornaban t’os scenarios dimpues de 20 anyos, meteba a fin a ista exitosa edicion.

 

O Trinquete ye una asociacion cultural que conta con mas de 70 socios, y dende fa mas de 12 anyos, treballa dinamizando actividatz en Arandiga. Dende que encenton a suya faina se fan cargo de parar, por eixemplo, a Tronca de Navidat, os Carnavals, conciertos, cursas u a Feria de Sant Martin.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.