Arcaine celebra iste cabo de semana una manga d’o XXIII Campionato Europeu d’armas prehistoricas

A localidat d'as Cuencas Mineras aculle una d'as mangas d'iste campionato. Se competirá con arco y propulsors prehistoricos

cartel_tirada_alcainegrMientres o venient cabo de semana, os diyas 15 y 16 de chunio se celebrará en Arcaine una manga d’o XXIII Campionato Europeu d’armas prehistoricas, concretament en o referent a arco prehistorico y tiro con propulsor. Iste campionato nomás se celebra en puestos a on i hai chacimientos prehistoricos, como os existents en o Parque Natural d’o Río Martín. Tamién s’han celebrau mangas d’iste campionato en Aragón en o río Vero.

Tot o material con o que son construidas as armas ha d’estar natural como fusta, bambú, pedrenya, plumas u ueso y fabricau mediant tecnicas prehistoricas. Se simula un itinerario en que se simulan accions de caza con istas armas. O campionato surtió en 1990 d’a man de bells prehistoriadors, etnografos y arqueologos belgas y franceses con a fin de reconstruir armas y artefactos prehistoricos y meter en común conoiximientos y tecnicas y potenciar os chacimientos arqueolochicos a on se celebrasen as prebas d’o campionato.

Amás se i ferán atras actividatz como una charrada o sabado sobre as pinturas rupestres d’a Canyada de Marco, feita por José Royo; y actividatz “prehistoricas” en as piscinas municipals.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.