Arnaldo Otegi abandona a prisión de Logronyo seis anyos dimpués

O lider abertzale ha saliu hue d'a prisión dimpués de seis anyos y medio por prebar de reconstruir a ilegalizada Batasuna

Foto: Kaosenlared.net (CC-BY-SA 3.0)

Foto: Kaosenlared.net (CC-BY-SA 3.0)

O dirichent d’a cucha abertzale Arnaldo Otegi ha abandonau iste martes a prisión de Logronyo a las 08.55 horas, debant de mas d’un centenar de personas que le han recibiu portiando ikurriñas y con chilos de “independentzia”, “euskal presoak etxera” (presos vascos ta casa), “Amnistía” y “Arnaldo lehendakari”.

En os suyos primers momentos de libertat, Otegi s’ha dirichiu a qui han acudiu a emparar-le ta asegurar que “i hai presos politicos en o Estau espanyol“, ya que seguntes ell “hue sale un preso politico d’una garchola espanyola”. O exlider de Batasuna ha dito sobre ETA que “a paz ye o camín” y ha reiterau que pretende levar ixe obchectivo dica a final“.

Otegi ha compliu seis anyos y medio de prisión, condenau por prebar de reconstruir a ilegalizada Batasuna. En salir de prisión, completament vestiu de negro, s’ha feito fotos con o suyo pai y con o suyo fillo. Horas antes, Otegi ha confirmau a suya intención d’estar o candidato de Bildu a lehendakari en as eleccions vascas d’o mes d’octubre. Sobre isto, a la salida de prisión ha admitiu que i hai muito “morbo” sobre a suya posible candidatura, ta dimpués afirmar que “o millor lehendakari ye o pueblo“.

Dirichents d’a cucha abertzale y a CUP le asperaban

Amás d’a suya familia, a la salida d’a garchola le asperaban quantos dirichents abertzales, entre ells o president de Sortu, Hasier Arraiz; o exdiputau cheneral de Guipuzcoa, Martin Garitano; y atros representants d’a cucha abertzale, como Joseba Permach, Pernando Barrena, o diputau vasco Iker Casanova, Miren Zabaleta -condenada por a mesma causa que Otegi que salió de prisión o pasau octubre-. Entre os congregaus ye tamién o expreso d’ETA Josu Zabarte.

Tamién i han acudiu historicos como Tasio Erkizia, Joseba Álvarez, Pablo Gorostiaga y Iñigo Iruin; y o secretario cheneral d’EA, Peio Urizar. Dica Logronyo s’han desplazau miembros d’as CUP como a diputada Anna Gabriel y o exportavoz en o Parlament David Fernández, y os cantantes Fermín Muguruza y Lluís Llach.

A las puertas d’a prisión s’han colocau efectivos de Policía Nacional y Guardia Civil. Poco antes de deixar a prisión s’ha puesto veyer por una finestra como atros presos se despediban d’ell amostrando una camiseta d’a Reyal Sociedat.

Fuent: http://www.eldiario.es/norte/euskadi/Arnaldo-Otegi-abandona-prision-Logrono_0_489951064.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.