Arnaldo Otegi continará engarcholau

O Tribunal Constitucional decide de mantener en a prisión a os condenaus por o caso Bateragune mientres no resuelva o recurso d'amparo

otegiO Tribunal Constitucional ha decidiu de mantener a Arnalgo Otegi en a prisión, a on o dirichent abertzale cumple una condena de seis anyos de prisión. Tamién continarán engarcholaus a resta de condenaus por o caso Bateragune, Rafa Díez, Sonia Jacinto, Arkaitz Rodríguez y Miran Zabaleta, entre que o TC resuelve o recurso d’amparo presentau contra a sentencia d’o Tribunal Supremo que los condenó a seis anyos y seis anyos y medio de prisión.

A fiscalía s’heba pronunciau en contra d’a libertat d’os dirichents independentistas entre que no se resolvese o recurso alegando a doctrina cheneral d’o TC, seguntes a quala no se suspende una condena mientres se resuelve un recurso si ixa ye superior a cinco anyos de prisión.

Otegi y a resta de condenaus son en a prisión dende o 13 d’octubre de 2009 acusaus d’haber prebau de reconstruir Batasuna. En setiembre de 2011, l’Audiencia Nacional espanyola condenaba a Otegi y Díez a diez anyos de prisión ‘por pertenencia a organización terrorista en grau de dirichent’, y a ueito anyos de prisión a Zabaleta, Rodríguez y Jacinto por pertenencia a banda armada. Txelui Moreno, Mañel Serra y Amaia Esnal estioron absueltos.

Un anyo dimpués plegó o veredicto d’o Tribunal Supremo, que no admitió os recursos d’a esfensa pero que rebaixó a pena: seis anyos y medio de prisión ta Otegi y Díez, y seis anyos t’os atros tres. A esfensa recurrió a o TC, que dimpués de meses ha decidiu de mantener-los en prisión dica que no resuelva o fondo d’a qüestión, en que habrá de determinar si anula u da validez a la condena. Os cinco de Bateragune son a l’inte de complir quatro anyos dentro d’a prisión.

Fuent: http://www.vilaweb.cat/noticia/4121594/20130604/arnaldo-otegi-continuara-empresonat.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.