Arrienda de manifestacions multitudinarias en as principals ciudatz de Brasil

Decenas de mils de personas protestan por a puyada d'o pre d'o transporte publico y a politica de grans acontecimientos esportivos

protestas brasilMils de personas se manifestoron ahiere en unas quantas ciudatz brasilenyas ta protestar por a puyada d’o pre d’o transporte publico y por l’elevau coste d’a organización d’a Copa Confederacions, que se fa istos días en o país, y d’o Mundial de Futbol de l’anyo venient. A manifestación mas multitudinaria tenió puesto en Río de Janeiro, con cient mil personas, pero tamién n’i habió en a capital, Brasilia, Belo Horizonte, Porto Alegre, Salvador y Sao Paulo. En bells casos i habió disputas con a policía.

A prencipal manifestación de protesta se produció en Río de Janeiro, a on millars de manifestants recorrioron con flors en a man o centro d’a ciudat cara ta Cinelândia. I habió qualques disturbios con chicotz collas que preboron d’esbarrar-se d’o recorriu autorizau por as autoridatz.

En a capital d’o país, Brasilia, diez mil personas, entre as qualas centenars d’estudiants de secundaria, se manifestoron contra a corrupción, o pre d’o transporte publico y as conseqüencias a la hicienda publica d’a celebración d’os grans acontecimientos esportivos d’iste anyo y o venient. Una colla de manifestants plegó dica o Congreso Federal, protechiu por un desplegue policial, y aconsiguió puyar-se-ne t’o teito. A policía fació servir gases glarimochenos ta expulsar-los.

Tamién i habió disturbios en Belo Horizonte, a on unas vint mil personas se manifestoron contra a puyada d’o pre d’o transporte publico y os gastos cheneraus por a Copa Confederacions, o Mundial de Futbol y as Olimpiadas d’o 2016. Os manifestants preboron de plegar ta l’estadio de Mineirao, a on s’heba chugau o partiu entre Nicheria y Tahití. A Policía Militar fació servir gases glarimochenos y balas de goma ta empachar-lo.

En o sud d’o país, en Porto Alegre, quince mil personas protestoron debant d’o concello tamién contra os partius politicos y i habió incidents quan una colla s’esbarró por l’avenida Ipiranga.

En a capital economica d’o Brasil, Sao Paulo, epicentro d’as protestas, sixanta y cinco mil personas se manifestoron contra a puyada d’o pre d’o transporte publico de 3 reals a 3,20 y contra a violenta represión d’a manifestación d’o pasau viernes.

Cal recordar que as protestas empecipioron chustament a semana pasada en Sao Paulo, pero, dimpués d’a violenta represión d’a manifestación d’o viernes, que ha comportau una investigación dentro d’a Policía Militar, s’han estendillau por tot o país.

Ahiere tamién i habió manifestacions en ciudatz como Salvador, Belamos, Victória y Curitiba.

Rousseff considera lechitimas las protestas

A presidenta de Brasil, Dilma Rousseff, ha considerau lechitimas as protestas: ‘a presidenta considera as manifestacions pacificas como lechitimas y propias d’a democracia y que ye propio d’a choventut manifestar-se’, dició a secretaria de Comunicación Social, Helena Chagas. Por a suya parte, o secretario cheneral d’a Presidencia, Gilberto Carvalho, admitió a preocupación d’o gubierno por as protestas y fació un clamamiento a o dialogo a os suyos promotors ta abordar ‘os anhelos’ que han empentau a la chent a salir a la carrera.

Fuent: http://www.vilaweb.cat/noticia/4126290/20130618/onada-manifestacions-multitudinaries-principals-ciutats-brasil.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.