Artieda aculle una trobada ta “continar vivindo en aragonés”

Mientres tot lo cabo de semana se ferán clases y actividatz en aragonés

cartelO lugar d’Artieda, en a Chacetania, ye l’esleixiu t’acullir a “Trobada d’agüerro”, un cabo de semana a on que dende a organización se clama a “continar vivindo en aragonés”. Continan asinas as actividatz d’aprendizache y convivencia en ista luenga que prencipioron iste pasau mes de chunio en una trobada que se fació en a Val de Chistau.

“A propuesta ye fer una trobada d’un cabo de semana de chent que l`agane d’amillorar l’aragonés oral. Queremos chuntar-nos entre totz pa fer unas chornadas en do aprendamos los unos de los otris a charrar un millor aragonés. La idea ye de creyar ixos días un ambient do l’aragonés siga a sola luenga de comunicación entre nusatros pa fer posible vivir en aragonés“, explican dende a organización.

A trobada escomencipia lo viernes con bella clase de tardes y una charrada sobre o vocabulario en aragonés arredol d’o sexo. O sabado continarán as clases y antimás se ferán dos charradas. Una sobre o turismo lingüistico y atra sobre o conflicto de l’entibo de Yesa, con chent d’o lugar d’Artieda, dreitament afectau por o recreiximiento. De nueitz se ferá una sesión mosical y bi habrá una exhibición de txalaparta de man d’a colla Flakutt. O domingo se ferá una cursa t’o lugar albandonau de Ruesta y se prencipiará a aprestar a siguient trobada.

O pre de toda la trobada ye de 45 euros si fa u no fa, a pensión completa. Ta plegar en Artieda se puede prener o bus que sale o viernes dende Chaca u contactar con a organización (escribindo a anchelreyes@gmail.com) que coordina os autos que salen dende Zaragoza y Pamplona

 

Una rispuesta a Artieda aculle una trobada ta “continar vivindo en aragonés”

  1. Pingback: Un prencipio de curso bien animau | Asociación Cultural Nogara – Religada

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.