Artieda esfendió en as Cortes a oposición t’o recreiximiento de Yesa

Representants d'o lugar y de l'Asociación Río Aragón dan as suyas razons contra la obra en siede parlamentaria

Intervención d'os representants d'Artieda (Foto: Aturando Yesa)

Intervención d’os representants d’Artieda (Foto: Aturando Yesa)

Iste martes, o recreiximiento de Yesa ye estau lo protagonista en a Comisión de Comparecencias y Demandas Ciudadanas. Os vecins d’Artieda representaus por o suyo alcalde Javier Jimenez y por Serchio Palacín en representación d’os Chovens d’Artieda han preso a parola en un primer inte, esfendendo o suyo dreito de continar vivindo en o lugar y tenendo as tierras d’os vecins y d’o concello, agora expropiadas ta fer-ie as obras. Tamién convidoron a todas as collas parlamentarias a visitar o lugar y a redolada ta conoixer-lo y viyer os problemas sobre o terreno. O representant d’os chovens preguntó a los representants politicos si “podeba vivir en o lugar suyo”.

Os partius han remerau as suyas posicions quanto a lo recreiximiento. A unica dubda ye plegada dende IU que, a traviés d’o suyo portavoz, ha indicau que o refirme t’o recreiximiento que encara tienen podría cambiar en un futuro amanau, pues ye obchecto de debat adintro d’o suyo partiu. Dende o portavoz de CHA, unica colla parlamentaria que s’oposa a lo recreiximiento, han expresau a suya solidaridat con los intervinients y han remerau a represión d’as enrestidas d’a Guardia Civil o 10 d’octobre quan prebaban de dentrar en o lugar ta un d’os procesos d’expropiación.

PSOE, PP y PAR han continau amostrando-se favorables de tot a lo recreiximiento y han negau que isen a cambiar a suya postura, mantenida mientres muitas anyadas. Totz tres partius han esfendiu “l’intrés cheneral” d’a obra y l’alcuerdo de todas as fuerzas politicas a o respective, fueras de CHA. O PAR ha dito no querer dentrar en o debat d’os “intreses amagaus” que heba nombrau o representant d’o Chovens d’Artieda, negando que bi’n hese. Dende o PP, antimás, han demandau a los representants d’Artieda a que “como han feito atros lugars”, dentrasen en negociacions con as autoridatz por una “intelichencia estratechica”. Sobre a pregunta d’o choven d’Artieda, os representants d’istas collas alegaban que” no totz os chovens pueden vivir a on que quieren, y muito menos agora”.

En a  respuesta d’os representants d’Artieda han meso en dubda l’intrés cheneral d’a obra y han remerau que Jaume Matas, ministro de Meyo ambient en o Gubierno espanyol presidiu por Aznar, dició en meter a prime piedra d’a obra que ixa “yera a primer piedra d’o trasvase“. D’igual traza han remerau tamién os millars de personas que ya habioron de marchar d’a redolada por l’entibo. A intervención ha rematau repetindo lo convite a visitar o lugar y conoixer a redolada.

Dimpués ye plegau lo turno de l’Asociación Río Aragón, tamién contraria a lo recreiximiento. O president de l’asociación Luis Solana ha remerau parti d’o proceso de licitación y construcción de l’entibo, y d’os suyos protagonistas, beluns en procesos chudicials, ta dar paso a un informe tecnico d’o Profesor de Cheolochía d’a Universidat de Zaragoza Antonio Casas, sobre a viabilidat de l’entibo y os suyos periglos, más que más, os derivaus d’os zaguers movimientos d’as laderas. L’informe critica l’afirmación feita por a CHE de que o recreiximiento estabilizaría as laderas y, de feito, esfiende que pasaría chusto lo contrario. Iker Aramendia, representant d’a iniciativa contra la obra de Sangüesa, ha dau l’anvista d’iste municipio que ya ha habiu de fer desaloixar decenas de casas por os periglos d’os eslizamientos que bi habió fa bells meses.

A intervención d’os partius politicos no ha cambiau guaire respecto a la respuesta anterior. Sí que totz han asegurau que yeran prou preocupaus por os temas de seguridat en l’entibo. Os partius favorables a o recreiximiento han esfendiu a existencia d’informes a favor d’a obra y que guarancian a suya seguridat. Dende o PSOE han asegurau que “debant de qualsiquier dubda de seguridat proposaremos d’aturar a obra”. O PP no ha dubdau d’ista, y creye que precisament, o recreiximiento va tan a monico porque ye habendo-ie “toda mena de guarancias tecnicas y churidicas. Ha tornau a demandar-les negociación “igual como facioron atros lugars d’a redolada”, tamién afectaus por l’entibo.

O debat ha rematau con una zaguer intervención d’os representants de l’asociación Río Aragón. Antonio Casas ha esfendiu que os suyos informes son mesmo menos alarmistas que no atros que han feito dende a propia Confederación Hidrografica de l’Ebro (CHE), seguntes os quals “caldría evaquar Sangüesa agora mesmo“. Luis Solana ha esfendiu as alternativas t’o recreiximiento y ha afirmau que “decir que o recreiximiento solucionará os problemas d’as laderas ye una faltada t’a intelichencia“. Seguntes a suya opinión, a obra “s’habrá de descartar antis u dimpués”, en considerar-la inviable, y ha demandau a las collas parlamentarias que lo faigan antis con antis. Iker, o representant de Sangüesa, les ha remerau que os problemas d’o recreiximiento han pasau as mugas aragonesas – o lugar de Sangüesa ye en Navarra – y que “o partiu no ha rematau. No ha feito que prencipiar“, en referencia a que totz os partius han insitiu que yera un tema muito charrau ya.

 

2 Rispuestas a Artieda esfendió en as Cortes a oposición t’o recreiximiento de Yesa

  1. Pingback: Artieda esfendió en as Cortes a oposición t’o recreiximiento de Yesa | AraInfo | Achencia de Noticias d´Aragón

  2. Pingback: Zangoza acullirá una atra manifestación contra o recreiximiento de Yesa | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.