Artieda refusa de nuevas sinyar as actas d’expropiación

Ye a segunda vegada que os tecnicos d'a CHE marchan con as mans vuedas d'Artieda por l'actitut d'os vecins

Os vecins tallando a carretera (Foto: Rober Tico)

Os vecins tallando a carretera (Foto: Rober Tico)

Os vecinas d’Artieda, alcompanyaus por chent de l’Asociación Río Aragón, Coagret, CHA u Puyalón han tornau a refusar sinyar as actas d’expropiación d’as fincas afectadas por o recreiximiento de l’entibo de Yesa por segunda vegada. Os tecnicos d’a Confederación Hidrografica de l’Ebro, refirmaus por varias dotacions d’a Guardia Civil espanyola, han iu t’Artieda con a intinción de fer efectivas as expropiacions de varios terrenos, propiedat de nueu vecins y d’o propio concello d’a localidat.

Ye a segunda vegada que a CHE preba de fer efectivas ixas sinyaturas, pero en as dos ocasions, Artieda ha saliu ta esfender a suya tierra, con concentracions pacificas y a negativa d’os vecins afectaus a sinyar ixas actas. Luis Solana, president de l’Asociación Río Aragón ha esplanicau que encara que no s’han feito as sinyaturas, a CHE podria continar con os tramites ta expropiar fincas afectadas por a restitución d’a carretera enta Ruesta, anexa a o recreiximiento de l’entibo a cota alta, que en primeras no s’habria de fer, y en un prochecto que ya supera en 100 millons d’euros o gasto.

Gracias a l’actitut d’os vecins y d’a chent venida d’atros lugars ta refirmar-los os tecnicos d’a CHE han desistiu unatra vegada a expropiar os terrenos, encara que o tramite almenistrativo continará entabant.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.