Artieda torna a aturar as expropiacions ta l’entibo de Yesa

Vecins y activistas aturan a los tecnicos d'a CHE que anuncian que "bi tornarán".

Vecins d'Artieda en a carretera t'o lugar

Vecins d’Artieda en a carretera t’o lugar

O lugar d’Artieda ha tornau a conseguir aturar as expropiacions d’as tierras suyas que a CHE considera que cal ta fer o recreiximiento de l’entibo de Yesa. Iste maitín más de 150 personas han tallau a carretera que leva t’o lugar d’a Chacetania, fendo que os tecnicos d’a CHE no podesen fer as actas d’expropiación d’as 62 hectareas que reclaman ta recreixer l’entibo.

Mientres os diyas d’antis, a chent d’o lugar ya heba convocau bells actos ta explicar o conflicto: prochección de documentals, cursas por a redolada, charradas u mesmo una acampada a on que se ha charrau d’o pasau, present y futuro de l’entibo, o lugar y a redolada remerando o impacto que ya tenió a construcción de Yesa.

Dende as ueito d’o maitín os habitadors d’Artieda, acompanyaus de chent d’organizacions como Apudepa, a Plataforma en Defensa de l’Ebre, COAGRET, CHA u Puyalón, han plenau o lugar con pancartas expresando o refús t’as obras. Arredol d’as diez i ye plegada a Guardia Civil escoltando a los funcionarios d’a CHE y demandando a la chent que marchase d’a carretera. Os manifestants han respondiu sin reblar y sin deixar-les pasar-ie, con chilos contra o entibo y mesmo han cantau o “Canto a la libertad” de Labordeta en o cabo d’anyo d’a muerte suya.

Mientres una hora si fa u no fa, os representants d’a CHE y a Guardia Civil bi son estaus entre que os manifestants les deciban que “no quereban diners, nomás vivir astí” u les demandaban por “o qué ferían si estasen ells os que i vivisen”.

Arredol d’as 11 a CHE primer, y a Guardia Civil dimpués, en son marchaus sin poder fer as actas d’expropiación. Pilar Martínez, chefa de servicio d’a CHE, ya ha anunciau que en “bells 10 u 12 diyas i tornarían”.

De man de l’Asociación Río Aragón dan razons contra as expropiacions: Seguntes os suyos representants, istas expropiacions no fan falta y pillan muitas más hectareas que no’n cladrían ta fer l’entibo dica a cota alcordada en as Cortes. Antimás remeran que l’entibo que bi ha agora nunca no se plena, que o presupuesto ya plega a triplicar l’orichinal y que bi ha un grau problema de seguridat por os movimientos d’as laderas.

 

Una rispuesta a Artieda torna a aturar as expropiacions ta l’entibo de Yesa

  1. Entalto Artieda i las suyas gens!

Deja un comentario

Tu dirección de correo electrónico no será publicada. Los campos necesarios están marcados *

Connect with Facebook

Puedes usar las siguientes etiquetas y atributos HTML: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.