Artieda torna a refusar as expropiacions

A Guardia Civil fació bella decena de ferius en una enrestida contra a chent d'o lugar que se i manifestaba

Os manifestants antis d'a enrestida d'a Guardia Civil

Os manifestants antis d’a enrestida d’a Guardia Civil

O lugar d’Artieda ha tornau a refusar as expropiacions d’as suyas tierras ta fer o recreiximiento de l’entibo de Yesa. Como atras vegadas, os habitadors se heban chuntau en o puent ta que os funcionarios d’a CHE no podesen dentrar-ie ta sinyar as actas d’expropiación, pero en ista vegada a Guardia Civil ha enrestiu contra os manifestants, causando más d’una decena de ferius.A convocatoria yera a las 9:30 en o puent d’Artieda. A ixa hora vecins y refirmants de toda mena de organizacions bi yeran ta mirar de que os funcionarios d’a CHE no podesen dentrar en o lugar. En ista ocasión, a Confederación Hidrografica de l’Ebro prebaba de plegar por Ruesta con un gran dispositivo d’a Guardia Civil. A manifestación, alavez, ha habiu de marchar ta bloqueyar ixa atra dentrada.

Dimpués de comprebar que no se les iba a deixar plegar en o lugar, a Guardia Civil ha feito baixar a los suyos antidisturbios. Bells minutos dimpués, y habendo-se leyiu un manifiesto de man de belunas d’as chovens d’o lugar, a Guardia Civil ha prencipiau una enrestida contra os manifestants, deixando más d’una decena de ferius. Os manifestants, dimpués de aturar a enrestida s’han posau por tierra chilando contra o entibo, y a intervención d’a Guardia Civil y cantando cantas de Labordeta u La Ronda de Boltanya.

Dende COAGRET, o suyo president Valentín Cazaña, ha prebau de charrar con o president d’a CHE y con Delegación de Gubierno, ta que fese recular a la Guardia Civil. A tensión ha continau mientres buen rato, encara que no bi ha habiu más agresions fisicas. A la fin a Guardia Civil en ha marchau, deixando a los habitadors d’o lugar acarrazando-se y celebrando-lo.

L’alcalde ha habiu de sinyar un documento decindo que no se podeban sinyar as expropiacions y que totz os propietarios d’as 60 hectareas refusan a suya expropiación. O trango siguient será a expropiación forzosa.

Dende diferents organizacions, como CHA u COAGRET sinyalan a lo president d’a CHE, qui demandó a presencia d’a Guardia Civil, y a Gustavo Alcalde, o delegau d’o gubierno espanyol en Aragón, como os responsables de l’actuación policial y demandan a suya dimisión u cese.

A lectura d'o manifiesto remerando os lugars albandonaus por entibos

A lectura d’o manifiesto remerando os lugars albandonaus por entibos

Manifestants y Guardia Civil dimpués d'a enrestida

Manifestants y Guardia Civil dimpués d’a enrestida

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.