As autoridatz espanyolas no han procesau nunca a garra acusau por sobornos a funcionarios foranos

A Fiscalía Anticorrupción ha recibiu un caso de posible soborno internacional aintro d'os diners regularizaus en l'amnistía fiscal de Montoro

logoEspanya nunca no ha procesau a garra interpresa o ciudadan espanyol acusau en atros estaus de sobornar a funcionarios publicos. Seguntes advierte a Organización t’a Cooperación y o Desembolique (OCDE) en un informe publicau o martes, en as tretze anyadas dende que Espanya sinyó a convención t’a luita contra o soborno internacional nomás s’han investigau siet casos sospeitosos. Totz son estaus archivaus, en a más gran parti d’os casos por pasar-se os plazos.

A colla d’expertos que ha investigau o caso espanyol reitera a suya preocupación por ista situación y por a ineficient trasposición d’a lechislación internacional sobre corrupción y sobornos. Asinas, a lechislación espanyola esferencia entre sobornar a un funcionario publico forano u a uno europeu u que treballe en as institucions europeas. Antimás, bi excluye a las interpresas publicas d’estar obcheto punible d’istas investigacions, a tamás de que belunas tienen arrienda presencia difuera de l’Estau espanyol.

Espanya ye antimás en a colla de paises más vulnerables a istas practicas por a suya alta exposición a o sector d’a exportación de material d’esfensa y a relacions comercials con paises d’o Tercer Mundo.

L’informe d’a OCDE destaca graus ineficiencias a la hora d’investigar u chuzgar ista mena de casos a on que interpresas u ciudadans espanyols sobornan a funcionarios en atros paises ta conseguir tractos de favor. Asinas, penan de que a Fiscalía Anticorrupción no ye estada informada “de esclaters casos de corrupción difuera de l’estau que sí plegoron t’atras instancias d’a Chusticia espanyolas”. Asinas, quan iste organismo especial ye advertiu de bellas practicas, istas ya han prescrito.

Antimás, a OCDE alerta de que mientres a suya visita en chulio se reunió con as autoridatz fiscal d’o País Vasco y Navarra, que no facioron caso d’os clamamientos internacionals ta eliminar a posibilidat de deducir-se fiscalment os sobornos. Encara que pareixca mentira, en muitos paises as interpresas se pueden deducir ixa mena de gastos como parti de l’actividat suya difuera d’o pais.

Asinas, Ficienda publicó una instrucción en 2007, a on que se feba explicito que os sobornos a servidors publicos en atros estaus no se podeban considerar como deducibles en materia d’impuestos. Manimenos, os representants d’as autoridatz fiscal vascas y navarras aseguroron a l’equipo d’a OCDE que no consideran vinclant ista instrucción d’a Ficienda espanyola debiu a la particularidat d’os suyos dreitos forals.

A OCDE alerta d’ista lacuna churidica en Espanya, encara que as autoridatz d’as dos comunidatz le aseguroron que son treballando en redactar una nueva iniciativa en materia d’Impuesto de Sociedatz que será en linia con os estandars europeus, que encara no ye feita publica.

Atro elemento ta que se’n fese a OCDE yera l’aplicación d’a recient amnistía promovida por o ministro Critobal Montoro t’a repatriación de capitals. A OCDE teneba medrana de que ista regularización de diners negros servise t’atrayer ta Espanya capitals emplegaus en o lavau de diners u en casos de corrupción. Manimenos, seguntes replega l’informe, a Fiscalía Anticorrupción aseguró a la OCDE que nomás ha recibiu un caso d’os que han plegau t’as mans de Ficienda, sospeitoso de proceder de beluna d’istas practicas ilegals.

A organización fa una relación d’os siet casos investigaus dica agora por Espanya, muitos d’ells destapaus por meyos de comunicación, pero que han teniu muita poca trascendencia publica. Antimás, resalta que en garra d’os casos s’investigó a personas churidicas (interpresas) . A tamás d’a imputación de 16 personas, denguna no estió procesada y nomás dos d’os siet caos, plegoron a estar investigaus chudicialment.

Fuent: http://www.eldiario.es/economia/Espana-vista-gorda-cohecho-internacional_0_88191328.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.