As bieras artesanas se trobarán iste cabo de semana en o III Birragoza

L'exito d'as anteriors edicions ye preba d'o gran intrés por as bieras artesanas

Imachen de l'anterior edición de Birragoza (Foto: Birragoza)

Imachen de l’anterior edición de Birragoza (Foto: Birragoza)

O festival de bieras artesanas de Zaragoza “Birragoza” se celebra ista semana, esdevenindo ya una d’as citas que no cal ixublidar garra verano t’os amants d’a biera. Más de vinte “bierers” amostrarán as suyas obras en os stands que acullirá a Plaza d’o Centro d’historias de Zaragoza os diyas 22 y 23 d’agosto.

As bieras artesanas aragonesas i serán más presents que no nunca, con Populus, HopSexion, Gisberga, Ordio Minero y Lupulus como representants. Pero tamién se i podrán tastar bieras plegadas de Catalunya, Castiella, Alemanya, Belchica, Valencia, Anglaterra, Escocia… dica completar decenas de variedatz diferents.

Birragoza prencipiará o viernes con un taste de bieras artesanas a las cinco d’a tarde. Dende ixa hora, prencipiarán toda una serie d’actividatz y tallers ta conoixer millor o mundo d’a biera artesana. Antimás, mientres tot lo cabo de semana, bi habrá conciertos y punchadiscos que mosicarán o festival.

Ta tastar as bieras, cal mercar o bono de 5 € que da dreito a lo vaso, a guida de bieras y a primer biera en qualsiquier puesto d’o festival. Dimpués, cada biera tien o suyo pre, por un regular de 1,5 euros. Tamién bi habrá un puesto a on que se podrá cenar salchicas, queso u pernil.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.