As Bodas d’Isabel s’adaptarán más a o sieglo XIII

S'adhiben ista anyada dos scenas nuevas. Bi habrá 63 actos oficials.

CartelA ciudat de Teruel ya se ye parando t’a representación d’a leyenda d’os Amants de Teruel, Diego y Isabel, que se celebra totz os meses de febrero. Ista anyada a representación prebará d’estar más fidel a l’inte historico a on pasa a historia, arredol de l’anyada 1217.

As dos principals novedatz serán en o casorio d’Isabel con Pedro d’Azagra y en o funeral de Diego de Marciella. O casorio será más amanau a lo rito mozarabe que se i feba t’a part d’alavez y no bi habrá tanta borina. D’atra man, o funeral, que dica agora s’adaptaba a las trazas d’o sieglo XIX, será más aparatero. En ixas envueltas ‘a chent se foteba trucazos en os escudos, s’estiraban d’os pels y asinas asinas’, ha explicau a organización.

Antimás bi habrá dos nuevas scenas. La una sobre o naiximiento de l’arte mudechar y una atra sobre o Ternasco d’Aragón. Mari Carmen Torres, qui canta ‘La canción de los amantes‘, cantará por primer vegada a suya nueva canta ‘El lamento de Isabel‘ mientres Diego demanda un beso a la suya aimada.

Como todas as anyadas a mosica i será present por tot Teruel. En a Hayma cultural i tanyerán Esfuriatronadas y os irlandeses Alalé o viernes y Wyrdamur y Lurte a nueit d’o sabado. Os mosicos d’a companyía Almugavar Ixera tamién i ferán un pasavillas ixa tardi.

As Bodas prencipiarán o chueves a las 21:00 con l’anuncio d’a muerte de Diego y rematarán o meyodiya d’o domingo con a besada colectiva. O programa entero se puet consultar aqui.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.