As Bodas d’Isabel ya tienen programación

Más de 90 actos en un d'os cabos de semana más turisticos de l'anyo ta Teruel

Os amants de Teruel en a zaguer scena

Os amants de Teruel en a zaguer scena de 2013

As Bodas d’Isabel de Segura de 2014 plegan  un anyo más ta fer de Teruel una ciudat ambientada de tot en o medievo. Iste lunes s’ha presentau a programación d’ista edición d’as fiestas, que prencipiarán o venient 20 de febrer, quan se monten os puestos y haymas que emplirán Teruel tot lo cabo de semana.

O programa d’estianyo tien más de novanta actos con teatro, actuacions, actividatz, tallers, conciertos, torneus, exhibicions,… ta toda mena de publicos. Raquel Esteban, directora d’a Fundación Bodas de Isabel, ha  destacau como una d’as principals novedatz o cambio d’a scena d’o chueves. A on que dica agora se viyeba “L’anuncio d’a muerte de Diego”, se ferá “As mullers deshabitadas”, una scena a on que una colla de mullers pena porque a Villa s’haiga quedau sin hombres en marchar t’a guerra, enreligando-lo con a zaguer scena de “A marcha de Diego”, “A muller que aguarda”, a on que Isabel despide a lo suyo amau y promete asperar-le mientres cinco anyos. Seguntes a suya opinión “a fiesta ye viva, y istas novedatz fan que creixca cada anyo, y que encara que se represente a mesma trachica historia, o publico nunca no la veiga d’a mesma traza”

Atras actividatz ya clasicas s’ixamplan. Asinas, bi habrá dos diyas de Torneu Medieval, y a hayma cultural tendrá tres conciertos: Esfuriatronadas o chueves, Mar del Norte o viernes y Lurte o sabado. O programa completo se puede consultar en a web d’a Fundación. Tamién se podrá descargar una aplicación con o programa ta dispositivos movils a partir d’a semana venient. Atra d’as novedatz tecnolochicas que plega en ista edición ye l’habilitación d’una plataforma d’emisión en streaming a on que se podrán viyer as scenas principals y tot lo conteniu audiovisual.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.