As carreras d’a Madalena y o Gancho acullirán a segunda edición d’o Circo Social

Iste 1 y 2 de chunio se celebrará en Zaragoza o II Festival de Circo Social d'o Casco Historico

Circo-Social

Foto: A54insitu

A “carpa” d’o Circo Social torna de nuevas a o Casco Historico, y se “instalará” os días 1 y 2 de chunio ta celebrar o II Festival de Circo Social d’o Casco Historico. O pasacarreras inaugural que partirá d’a Plaza Sas o sabado 1 de chunio será l’enguero oficial de tot un cabo de semana a on o Casco Historico se convertirá en una carpa imachinaria de Circo Social, a on os protagonistas son por excelencia, os ninos y chovens artistas que aprenden y practican as distintas disciplinas circenses mientres l’anyo en a Escuela de Circo Social d’o Vico.

Mientres tot o primer cabo de semana de chunio, as plazas y carreras d’a Madalena y o Gancho serán as pistas prencipals d’iste Circo Social, nomás en Zaragoza, y será a on se podrán presenciar os espectaclos que protagonizan mas de 18 grupos artisticos de ninos y chovens formaus en os cursos y tallers que s’han desembolicau entre l’anyo en mas de 20 recursos educativos d’o Casco Historico.

Ista segunda edición d’o Festival de Circo Social cuenta con propuestas artisticas ta totz os publicos con un denominador común: participación, diversión y convivencia. Y ye que amás d’as y os participants en as actividatz d’a escuela, diversos grupos artisticos perteneixients a mas de 20 entidatz y recursos municipals d’o vico y difuera d’ell amostrarán as suyas destrezas en as diversas artes d’o circo, dende o clown u os malabars dica os aerios, o parkour u a machia.

Asinas, i tendrán puesto 7 espectaclos de circo a cargo de 14 companyías de circo profesionals que colaboran con a Escuela de Circo Social d’o Casco Historico, y 18 grupos artisticos formaus por ninos y chovens alumnos. Amás 10 tallers d’iniciación a o circo tendrán puesto o cabo de semana, ubiertos a la participación de ninos, chovens y familias. Y tot ixo, enguerau por un pasacarreras multicolor que partindo d’a Pza Sas y carrera Alfonso, recorrerá as carreras d’o centro d’o vico dica a Madalena.

O Festival ye a muestra final d’un proceso formativo anyal protagonizau por ninos y chovens, chunto a artistas y formadors y recursos educativos, socials y culturals embrecaus y/u en colaboración con a Escuela de Circo Social d’o Casco Historico, como espacio y ferramienta educativa y preventiva que favoreix a convivencia intercultural y refuerza a cohesión social en o Casco Historico.

Programación II Festival de Circo Social d’o Casco Historico

Fuent: http://arainfo.org/2013/05/36325/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.