As Cortes d’Aragón evitarán por lei os desaloixos y tallo de suministros basicos a fogars en vulnerabilidat social

Totz os grupos en as Cortes pactan una definición de vulnerabilidat social referenciada en l'IPREM. A futura lei preba d'evitar o veto d'o Gubierno espanyol

Envista de l'hemiciclo d'as Cortes en a sesión plenera. Foto: Cortes d'Aragón

Envista de l’hemiciclo d’as Cortes en a sesión plenera. Foto: Cortes d’Aragón

As Cortes d’Aragón acordoron unanimement tramitar conchuntament como lei o decreto-lei d’emerchencia social aprebau por o Executivo aragonés d’aviento pasau y a proposición de lei de garantías socials que ha presentau Podemos, con a fin que garra familia pueda estar expulsada d’a suya vivienda ni pierda qualques servicios, siempre que siga en “vulnerabilidat social“.

Una familia ye en “vulnerabilidat social“, seguntes iste acuerdo, si ingresa menos de 14.910 € anyals, u 18.637 € si i hai como minimo un menor d’edat sin emancipar, una victima de violencia domestica u una persona dependient con discapacidat a lo menos d’un 33%. Istas cantidatz son referenciadas a l’IPREM (Indicador Publico de Renta d’Efectos Multiples) estatal.

As familias y personas en ista situación no podrán estar desaloixadas d’a suya vivienda si no pueden realoixar-se en unatra, y tampoco no podrá tallar-se-les servicios basicos como luz, gas y augua mientres dure a suya situación vulnerable.

O Gubierno espanyol aprebó recurrir debant d’o Tribunal Constitucional o decreto d’emerchencia social emitiu por o Gubierno aragonés d’aviento, pero debiu a la suya fusión con a propuesta de Podemos, que le atorga rango de lei, quan siga finalment aprebada, ista nueva redacción no quedará afectada por ista impugnación estatal.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.