As Cortz votan en contra de refusar os presupuestos espanyols por no contar con l’estatuto aragonés

PP votó en contra, PAR s'abstenió entre que CHA, IU y PSOE votoron a favor

Os votos en contra d’o PP y l’abstención d’o PAR han prevocau que as Cortz d’Aragón no refusen os presupuestos chenerals espanyols que seguntes dos proposicions de CHA y PSOE no han contau con l’estatuto aragonés ni con o suyo gubierno, como marca a norma estatutaria aragonesa.

Dentro d’a sesión plenaria d’ista semana se votaban dos proposicions (una de CHA y unatra de PSOE) que creticaban as retalladas y a manca d’inversions en o país dende Espanya por no cumplir con a legalidat que marca l’estatuto. O PP ha refusau as dos proposicions, encara que estió un d’os partius que aprebó a reforma de l’estatuto aragonés mientres que o suyo socio en o gubierno, o PAR s’ha absteniu. PSOE, CHA y IU han votau a favor de refusar os presupuestos espanyols.

A norma estatutaria exiche que antis de aprebar os presupuestos espanyols s’achunte a comisión mixta Aragón-Estau ta fixar o livel d’inversión estatal en Aragón, cosa que en iste caso no s’ha feito, seguntes, por eixemplo, a proposición de CHA que estió refusada.

Os presupuestos espanyols ta iste 2012 preveyen una reducción respective a 2011 d’o 13,19% d’a inversión real d’o sector publico estatal en Aragón que s’adhibe a o 70% de reducción acumulada dende 2009. “Garra d’as infrastructuras vitals y urchents ta Aragón se veyerán rematadas en ista lechislatura, y en muitos casos ni sisquiera s’empecipiará a suya construcción”, seguntes ha denunciau o president de CHA, José Luis Soro. CHA tamién voto en contra d’os presupuestos en o Congreso espanyol, asinas mesmo como IU u PSOE.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.