As eleccions vascas s’abanzan a o 21 d’octubre

Martxelo Otamendi: 'I habrá un president abertzale, seguro'

O president vasco, Patxi López, anunció ahiere, dimpués d’o consello de gubierno de Vitoria, a convocatoria d’eleccions abanzadas t’o 21 d’octubre, en cuenta de marzo, que ye quan tocaría. A situación economica, a cayida d’a recaudación d’as tres ficiendas forals y a presión d’os partius d’a oposición han empentau a López a abanzar as eleccions. O caso ye que a oposición feba muitos meses que le’n demandaba y o pacto de gubierno con o Partiu Popular s’heba trencau.

López sostiene que ha preso una decisión ‘de raso personal’, pero resulta que o 21 d’octubre ferá un anyo y un día d’a fin definitiva de l’actividat armada d’ETA.

‘Soi convenciu que ye a hora d’ubrir un nuevo tiempo de dialogo y d’acuerdos ta abanzar en a construcción d’un País Vasco solidario –explicó en una conferencia de prensa posterior–. Nusatros hemos cumpliu os prencipals obchectivos que nos proposemos. Agora toca renovar o contracto social con os ciudadanos, fa falta que a sociedat vasca trigue quí ha de comandar a nueva situación.’

‘Dica agora hemos feito servir as ferramientas d’o nuestro autogubierno ta aturar a crisi, y hemos contrimostrau que l’austeridat yera compatible con o creiximiento, pero agora ye o momento d’abanzar fendo reformas profundas’, dició o president vasco, dimpués de reprochar a o PP y a o PNV que empachasen a o suyo gubierno de tirar entabant con as midas amenistadas ta reconducir a situación economica, como por eixemplo a reforma fiscal.

López tamién esfendió o treballo feito: ‘Hue o País Vasco ye mas moderno y mas libre que no antes que plegasenos en o gubierno’, y ha desmentiu que i hese dificultatz de recaudación.

Otamendi: ‘ I habrá un president abertzale, seguro’

En ista entrevista Martxelo Otamendi explica como veye as eleccions y asegura que i habrá un nuevo president abertzale y que ‘o PNV se gastará muitos diners y muito esfuerzo en ista campanya, porque tien muit amán a EH Bildu’.

Muit amán PNV y EH Bildu, a o frent d’a intención de voto

O zaguer Euskobarometro publicau dica agora, feito entre os días 8-24 de mayo, indicaba que, en caso d’eleccions a o parlamento vasco, o PNV las ganaría, con 23-24 cadieras, seguiu muito amán por EH Bildu, con 22; os socialistas ferían una notable baixada, de 25 cadieras a 17; o PP mantendría os 12-13 que en tiene y Ezker Batua talment no dentraría en o parlamento.

Fuent: http://www.vilaweb.cat/noticia/4035400/20120822/eleccions-basques-savancen-21-doctubre.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.