As Escuelas Oficials d’Idiomas aragonesas imparten por primer vegada o Libel C1

Se i puede demandar plaza entre o 10 y o 13 de setiembre

Imachen: D.Ch.A.

Imachen: D.Ch.A.

As Escuelas Oficials d’Idiomas d’Aragón ufren por primer vegada amostranzas ta conseguir a titulación de C1 en o curso academico 2013-2014.

D’ista traza os centros que prencipian ista anyada a impartir iste titol son: a Escuela Oficial d’Idiomas nº 1 de Zaragoza, a on que s’ufre o titol de C1 en anglés, francés y alemán, a Escuela Oficial d’Idiomas Fernando Lázaro Carreter de Zaragoza, de Teruel y a d’Utebo, que lo ferán nomás en anglés, y a de Uesca que ufrirá o C1 en alemán y en anglés.

O plazo ta preinscribir-se ta cursar o C1 se ferá entre o 10 y o 13 de setiembre. As clases ya prencipiarán o 8 d’octobre. “Se tracta d’una iniciativa que mete en marcha o departamento d’Educación, Universidat, Cultura y Esporte con l’obchectivo d’implantar ista titulación de traza progresiva en a resta d’Escuelas Oficials d’Idiomas d’Aragón”, explicó Marco Rando, director de Ordenación Academica.

T’acceder-ie cal acreditar o libel B2 d’a luenga trigada con o certificau de Libel Avanzau feito por as Escuelas Oficials d’Idiomas. A preinscripción s’ha de fer a traviés d’o centro a on que se demande a plaza, parando cuenta que nomás se puede presentar una demanda por idioma preferent y nomás en un centro. O modelo de solicitut será o que figure chunto a la resolución que se publicará en a primer semana de setiembre en o Boletín Oficial d’Aragón.

Aragón conta con 12 Escuelas Oficials d’Idiomas y 12 extensions u aulas adscritas. Una d’ellas, la de Binefar prencipia ista anyada con dos collas d’anglés. Istos centros ufren a posibilidat d’estudiar anglés, francés, alemán, italiano, catalán, castellano, ruso y chino.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.