As intensas plevias obligan a la DChA a activar o nivel 2 d’o Plan d’Inundacions

S'ha produciu qualques afeccions en carreteras comarcals d'a provincia de Teruel y entre Pedrola y Luceni. Se vichila o nivel d'os ríos y d'as precipitacions

Río Alcherez (Bergantes). Foto: El Bergantes No Se Toca)

Río Alcherez (Bergantes). Foto: El Bergantes No Se Toca)

As intensas plevias, con aumentos cheneralizaus de cabal en toda a compleganza d’Ebro, han obligau a o Gubierno d’Aragón, a traviés d’o suyo consellero de Politica Territorial y Interior, Antonio Suárez, a activar a primer hora d’ista tarde o nivel 2 d’o Plan d’Inundacions d’Aragón.

As plevias han afectau por igual a la marguin cucha y dreita d’Ebro, y han chenerau un repunte en l’eixe d’Ebro en Castellón que aconseguirá maximos d’entre 1.500-1.900 m³/s, seguntes datos actualizaus y publicaus por a CHE d’o suyo Sistema Automatico d’Información Hidrolochica d’a Compleganza Hidrografica d’Ebro –SAIH-.

Mapa pluviometrico de l'AEMET

Mapa pluviometrico de l’AEMET

Iste fenomeno meteorolochico continará, a lo menos, mientres a chornada de hue, y presienta un alto grau d’incertidumbre sobre as zonas do van a producir-se as plevias y os suyos rechistros finals, seguntes datos de l’AEMET.

L’activación d’o nivel 2 d’o Plan d’Inundacions embreca a participación de medios operativos que trascienden as competencias d’a DChA, como ye o caso d’a Unidat Militar espanyola d’Emerchencias. Asinas mesmo, o Centro de Coordinación Operativa d’Emerchencias -CECOP- ha manteniu entre a tarde de hue reunions pa analisar a situación y coordinar totz os operativos d’emerchencia. Parando firme cuenta en a situación d’os ríos do as creixidas son estando mas importants: como os ríos Ega (en Nabarra), Leza, Cidacos y Alhama (en A Riocha), y en Aragón Uecha, Xalón, Uerva, Guadalop, Matarranya y Alcherez.

A CHE informa que en as zagueras horas s’ha produciu un nuevo repunte de cabal en l’Alcherez en Zorita, que ha aconseguiu un cabal maximo de 500 m3/s a las 08:00 horas de hue martes y ya presienta una tendencia descendent. Por iste aumento de cabals, s’aspera una punta de cabals d’entrada en o entibo de Calanda d’uns 600 m3/s y por ixo, s’ha aumentau o suyo vertiu t’o río dica os 400 m3/s.

Asinas mesmo, a CHE no descarta que entre as proximas horas encara calga aumentar os vertius de Calanda, ya que puede seguir plevendo en a suya compleganza mientres a chornada de hue. En a Uerva a creixida, por agora, ye ordinaria con cabals estabilizaus arredol de 16 m³/s augua abaixo d’o entibo de Mezalocha.

En a compleganza d’o Matarranya s’han produciu diversos repuntes dende o pasau sabado en o Matarranya y en l’Algás, pero en qualsiquier caso en os tramos altos han estau inferiors a os que se rechistroron en o mes de noviembre de 2014. Manimenos, en o tramo baixo d’o Matarranya en Nonasp s’han rechistrau cabals superiors por as aportacions d’a cuenca intermeya y a persistencia d’as precipitacions. En o Xalón se son rechistrando cabals extraordinarios en os tramos altos de l’Isuela, l’Aranda y o Manubles que entre as proximas horas irán evolucionando ent’os tramos baixos.

As plevias han produciu tamién afeccions y talles de carreteras, como en o caso d’o tramo entre Pedrola y Luceni. Fuertes aumentos de cabal en o río Queiles en Tarazona, y en o sud desprendimientos y nieu ha provocau numerosos problemas en o ret de carreteras comarcals de Teruel. Seguntes ha informau o Gubierno d’Aragón, “cal circular con muita precaución por a nieu en os tramos de carretera de Linars ta Valdelinars, de Mirambel ta Cantaviella, u en Rubielos de Mora endrezau ta Castellón de la Plana“.

Fuent: http://arainfo.org/2015/03/las-intensas-lluvias-obligan-a-la-dga-a-activar-el-nivel-2-del-plan-de-inundaciones/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.