As luitas socials s’integran en a ‘V’ que transcorrerá hue Barcelona

Bi ha convocadas diferents movilizacións con diferents lemas por tot Catalunya.

(Foto: Vilaweb)

(Foto: Vilaweb)

11 de setiembre, de nuevo dia D de l’independentismo catalán y, como en 2012 y 2013, nueva cita d’o sobiranismo en as carreras en una movilización que, seguntes os datos d’o numero d’inscritos feitos publicos en os zaguers días, mantendrá l’alto ran de participación d’a masiva manifestación de 2012 en Barcelona y a cadena humana que l’anyo pasau unió as buegas norte y sud de Catalunya. En ista ocasión, a movilización organizada por l’Asambleya Nacional Catalana y Òmnium Cultural, que o domingo superó o meyo millón d’inscritos -os que s’apuntoron a la cadena humana sumoron 455.000- formará una V -de “votar”, de “victoria”, de “voluntat”, explicoron os organizadors-, que transcorrerá por todas dos grans arterias de Barcelona, a Gran Vía y a Diagonal, con o vertiz en a plaça de Les Glòries. O clamor prencipal será sin dubda por a celebración d’a consulta d’autodeterminación, motivo por o qual a cucha independentista repartirá 200.000 cartulinas con a parola “desobediencia”, con a intención de deixar clara a suya voluntat de continar enta debant con o referéndum tot y que un recurso a o Tribunal Constitucional lo suspenda.

Pero en a manifestación independentista, amás, confluyirán ista tarde numerosas luitas socials, repartidas por os 73 tramos en os quals s’ha dividiu a protesta. Como l’atro anyo, os miembros d’o Procés Constituent sinyalarán a o poder financiero. Si en 2013 estió La Caixa l’obchectivo d’a protesta, con una cadena humana frent a la siede d’a entidat financiera en a Diagonal, ista vez o foco se situará sobre o Deustche Bank, con una concentración debant d’a siede d’o banco alemán en a confluencia d’a Diagonal con o Passeig de Gràcia, puesto an se troba l’Obelisco que o dictador Francisco Franco convirtió en un símbolo d’a victoria nacional. L’obchectivo d’ista convocatoria, sinyalan dende o Procés Constituent, ye “amostrar un absoluto refuso tanto debant d’un d’os símbolos d’o poder financiero internacional como d’o símbolo d’o poder que remera a enrestida historica contra os nuestros dreitos y libertatz”.

As Marchas por a Dignidat tamién tienen previsto situar en iste cabo d’o Passeig de Gràcia, con representants d’as marchas de quantos puntos d’o Estau, ta reivindicar o dreito a decidir sobre o modelo d’Estau y a sucesión monarquica y d’os ciudadans de Cataluña sobre o suyo futuro politico.”Dende o Movimiento 22M –Marchas d’a Dignidat- queremos manifestar a nuestra profunda convicción que si s’impide o dreito a decidir d’as chents, d’as mullers, d’os pueblos en os suyos espacios respectivos, se son de feito negando as qüestions mas esencials que configuran un sistema democratico”, sinyalan.

En os tramos situaus en a Gran Vía entre as carreras Balmes y Rambla Catalunya se darán cita a Federación d’Asociacions de Vecins de Barcelona (FAVB), sindicatos, ONG y atras entidatz como SOS Racisme, baixo o lema Por una Catalunya social. A ista concentración se sumará tamién a plataforma Guanyem Barcelona. En un comunicau, a vocera d’a formación, Ada Colau, confirmó lo refirme de Guanyem a las convocatorias d’a Diada y d’o 9 de noviembre -a calendata de la consulta- porque “o dreito a decidir ye un dreito basico, porque votar ye un prencipio democratico inqüestionable y porque consultar a la ciudadanía habría d’estar a normalidat democratica y no una excepción”. “Agora bien, dende Guanyem Barcelona tamién dicimos que queremos decidir-lo tot”, indicó Colau.

En os poco mas d’11 kilómetros de recorriu d’a V tamién tendrán o suyo espacio o movimiento LGTB, que clama a concentrar en a confluencia d’a Gran Via con a Carrera Llançà, y a Plataforma Prou Retallades, que tresladará a suya reivindicación d’una Sanidat publica y de calidat debant d’a siede de l’Institut Català d’a Salut. Atras d’as luitas socials que serán presents en a movilización son a d’as organizacions en luita por a Educación publica, que han clamau a participar con chmbretas amariellas, y os treballadors d’os meyos de comunicación publicos que han estau victimas d’importants retalles -como Tv3-, que lo ferán con camisetas royas.

En una rueda de prensa celebrada o pasau 4 de setiembre, representants de l’Asambleya Nacional Catalana y de Òmnium Cultural dioron a biemplegada a todas istas expresions que adhibirán reivindicacions socials a la movilización independentista.

Os contrarios a la independencia se tresladan ta Tarragona

A mas de 100 kilómetros d’allí, en Tarragona, Sociedad Civil Catalana -organización contraria a la independencia- levará a cabo una manifestación baixo o lema Recuperem o seny -recuperemos o sentiu-. A iste acto s’han sumau o PP y Ciutadans, asinas como Plataforma per Catalunya, y tamién miembros d’o PSC como a exministra socialista Carme Chacón, que ha confirmau a suya asistencia. O primer secretario d’o PSC, Miquel Iceta, afirmó que o partiu no sancionará a os militants que participen en a V de Barcelona ni en l’acto de Societat Civil Catalana en Tarragona.

La protesta que ha chenerau mas inquietut ye a convocada por a ultraderecha en o vico d’o Raval d’a capital catalana, una zona con una alta concentración de vecins de nacionalidat extranchera. Alianza Nacional se manifestará por as suyas carreras dende as 12.00 horas d’iste chueves baixo o lema Catalanidad es hispanidad. O Departamento d’Interior d’a Generalitat alcorzó finalment o recorriu d’a marcha faixista pero ha estau obchecto de duras criticas d’organizacions contra o faxismo y o racismo y sindicatos por autorizar a manifestación. Unitat contra el Feixisme ha convocau una movilización de 10.00 a 12.00 horas en a plaça Aurelia Capmany, tamién en o Raval, ta dicir Queremos un barrio sin nazis.

Fuent: http://www.lamarea.com/2014/09/11/las-luchas-sociales-se-integran-en-la-v-que-recorrera-hoy-barcelona/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.