As Malvinas deciden de continar en o Reino Uniu

Con un 99,8% de votos favorables en o referendum. Nomás tres votants d'os 1.500 se hi han oposau

malvinasAs Falklands u Malvinas, un conchunto d’islas en o cabo meridional d’America latina tant extenso (12.173 km2), como despoblau (poco menos de tres mil habitants), ha decidiu quasi por unanimidat que quiere continar baixo administración britanica. Con una participación d’o 92%, i hai habiu un 99,8% de votos favorables a continar vinclaus a o Reino Uniu, que son 1.513 votos. Y nomás n’i hai habiu tres (0,02%) que se i han oposau.

As islas mantendrán o suyo estatus actual de territorio d’ultramar britanico, como tamién o dreito d’autodeterminación, que permitirá a os suyos habitants de revisar o estatus quan quieran: ‘Isto podría incluyir a plena independencia en o futuro‘.

O referendum s’ha organizau dende o comité executivo d’as Falklands a resultas d’a ofensiva d’o gubierno archentino ta ubrir negociacions bilaterals con o britanico sobre a sobiranía d’iste territorio a 480 km d’a Patagonia y a 13.000 de Londres, por o qual ya protagonizoron una “guerra lampit” fa trenta y un anyos. O gubierno local, excluyiu de qualsiquier negociación por as autoridatz archentinas, quiere (fer) saber con ista consulta a opinión d’os islencos sobre o estatus politico d’as Falklands.

Londres, que reconoixe o prencipio d’autodeterminación de totz os dos mil islencos, esfiende a suya reclamación d’a sobiranía d’as Falklands (nombre que fa referencia a Anthony Cary, quinto vizconde de Falkland) con l’argumento que las ha administradas dende 1833. Por a suya parte, Archentina sostiene que tien dreito sobre as Malvinas (nombre derivau d’o municipio bretón de Santo-Maloù, d’a on yeran os mariners y pescataires que se i establioron en o sieglo XVIII) porque las heredó d’a corona espanyola dimpués d’a independencia, por un costau, y por a proximidat d’as islas t’o suyo territorio continental, d’unatra.

Ta Archentina, asinas, as Malvinas son una prolongación d’o país y, de feito, tien incluyius os 12.173 km2 de l’archipiélago aintro d’a provincia de Tierra d’o Fuego, como se plasma en a suya bandera, a on ye a silueta de todas dos islas prencipals, Soledad (6.353 km2) y Gran Malvina (4.377 km2), chunto a las deshabitadas islas Cheorchia d’o Sud y Sandwich d’o Sud, tamién baixo administración britanica y reclamadas por Archentina. Os tres territorios amaneixen explicitament mencionaus en a primera d’as disposicions transitorias d’a constitución, a on se diz: ‘a nación archentina ratifica a lechitima y imprescriptible sobiranía sobre as islas Malvinas, Cheorchia d’o Sud y Sandwich d’o Sud y os espacios maritimos y insulars correspondients, porque forman parte integrant d’o territorio nacional. A recuperación d’istos territorios y l’exercicio pleno d’a sobiranía, respectando o sistema de vida d’os suyos habitants, y d’alcuerdo con os prencipios d’o dreito internacional, constituyen un obchectivo permanent y irrenunciable d’o pueblo archentino.’

De feito, a disputa se mantiene en a ONU, a on as Falklands son un d’os deciséis territorios no autonomos d’o Comité Especial de Descolonización.

Fuent: http://www.vilaweb.cat/noticia/4093995/20130312/malvines-decideixen-continuar-regne-unit.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.