As monitoras de minchadors convocan una manifestación en o sieteno diya de vada

Contina sin haber-ie alcuerdo entre as partis

"Aición tupper" reivindicando os dreitos educativos (Foto: El ventano)

“Aición tupper” reivindicando os dreitos educativos (Foto: El ventano)

As monitoras de minchadors escolars decidioron iste martes de continar con a vada indefinida que levan seguindo dende o pasau 8 de chinero. Lo feban dende o Pignatelli, a on que tenioron una asambleya dimpués d’haber estau informadas d’as reunions entre o Departamento d’Educación, menau por Dolores Serrat, y as interpresas d’o sector.

Antimás, as monitoras convocoron una manifestación t’o miercols 16 que recorrerá as carreras zaragozanas dende as 18:00 en a Plaza Espanya dica la Plaza d’o Pilar. Anuncian tamién nuevas movilizacions de continar entrascau o conflicto como agora en ye.

Mientres istos diyas o seguimiento d’a vada ha cambiau, pero en muitas escuelas continan indo-ie nomás que os servicios minimos. Dende as monitoras tamién bi ha habiu queixas por ista razón. Os servicios minimos estioron imposaus por o Tribunal Superior de Chusticia d’Aragón, dimpués d’haber refusau os que proposó o Gubierno y que, en muitos casos, s’incumplioron de man d’as treballaderas. Istas denuncian que, en bells casos, os minimos son d’o 100% empachando exercer o suyo dreito a vada.

Os entrepuces ta l’alcuerdo son más que más en a puyada de chornals y en os tres diyas de libre disposición que agora tienen, y que de man d’as interpresas quieren sacar-ne.

A polemica “aición tupper”

A tensión contina puyando dimpués de que, o sabado 12 bellas monitoras fesen a polemica “aición tupper” a on que deixoron bells quantos “tuppers” con mensaches de refús t’a politica educativa, en una farola amán d’a casa de Zaragoza de Dolores Serrat, consellera d’Educación,  reivindicando os suyos dreitos. Ista aición tenió o refús de totz os partius politicos con representación en Cortes, encara que con muitos matices, como ye de dar. D’atra man tamién contó con o refirme de atras organizacions como CGT u a Marea Verda.

Dolores Serrat ha presentau, antimás, una denuncia por acoso por ista aición que, en parolas d’o gubierno “invade a vida privada lo que ye intolerable y traspasa as mugas democraticas”. De man d’as personas que facioron l’aición esfienden que ista se fació en a via publica en un puesto a on que pasaba muita chent ta fer vistera a reivindicación y que estió “somardas y pacifica”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.