As mullers y a crisi

María Añover

As mullers sufrimos as conseqüencias d’as crisis d’o sistema, en uns mercaus laborals que nos continan condenando, manimenos a la vueda retorica neoliberal sobre a conciliación, a paridat y os dreitos formals, y a altas taixas d’aturo, precariedat, temporalidat y subtriballo.

Tamién nos condenan a la segregación horizontal y vertical y a la discriminación salarial, asinas como en as condicions de treballo. S’adhibe a isto que as midas anti-crisi que se son adoptando pueden agravar as desigualdatz ya existents entre mullers y hombres. Por eixemplo, puyando a inversión publica en sectors economicos en crisi -poco sostenibles como o de l’automobil u o d’a construcción- , y no en infrastructura social – como educación, salut, cudiaus y protección social, con o risgo d’intensificar a división sexual d’o treballo y as desigualdatz que en chenera.

Dende ista anviesta, huei as mullers en Aragón tenemos mas dreitos sobre o papel que ahiere, pero seguimos estando treballaderas y ciudadanas de segunda. D’ista forma, habríanos d’examinar a propuesta d’a economía feminista, a economía social y a economía solidaria; perspectivas que tienen en comuna una reformulación conceptual d’a economía, un redimensionamiento d’o reproductiu y a reconoixencia d’o peso que tiene a dimensión simbolica y cultural.

Chustament, o primer trango ent’a construcción d’una economía verdaderament nueva ye un modelo economico que incluiga a economía domestica, a economía natural y a economía d’o voluntariau comunitario amás d’a economía de mercau, a gubernamental y a ilegal. Isto adugará a una redefinición d’o treballo productivo que da visibilidat y valor a o que realment nos fa saludables y felices, o cudiau, y que en zaguera instancia da como resultau prosperidat economica y sostenibilidat ecolochica.

Amás, iste aspecto suposa facilitar a las mullers ferramientas ta l’analís d’a realidat en os suyos mas diversos aspectos dende una perspectiva de chenero. A conoixencia d’a suya propia historia y d’a situación d’a muller relacionada con os distintos aspectos d’a suya realidat cultural, social, politica y economica, lo que suposa una base determinant en la luita teorica y practica por a igualdat d’oportunidatz entre mullers y hombres.

D’ista traza, talment sería necesario tornar de nuevo a una concepción mas moderna d’as luitas d’as mullers, expresada por Sarla Devi, combatienta d’a libertat contra o colonialismo britanico en as primers decadas d’o sieglo pasau: no pretendemos obtener nuevos dreitos d’os amos colonials, los obtenemos d’a voluntat.

3 Rispuestas a As mullers y a crisi

  1. Un articlo sobrebueno!

  2. Otro golpe d’a crisis en contra d’as mullers: a nueva lechislación dixará sin de pensión a un camatón de mullers d’o mundo rural…

    a oligarquía española: treballando por a escrebazadura social de hue y de maitin

  3. Cudiau con lo que se deseya que a lo millor se fa reyalidat.

    Ixe modelo de voluntariau comunitario ye lo que quieren fer.

    A simient ye en os “bancos d’o tiempo” que en zagueras son empentando-sen por Concellos y asociacions. Con o cual mientras ellos se quedan cobrando ixa deuda eterna más os intereses en euros “reyals” (en o fundo no son que bits en una pantalla), a nusatros nos pagarán con tiempo, y ye de dar que o sistema se complexizará y sofistacará y puestar que surta un euro B de caracter no monetario (en o sentiu tradicional).

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.