As navatas tornarán a baixar por o Galligo

As XI chornadas por o Galligo amostrarán como se baixaba o río d'antismas en una chornada emocionant

Navaters baixando por o Galligo

Navaters baixando por o Galligo

A baixada de navatas por o río Galligo ha esdeveniu un d’os acontecimientos culturals más sinyalers d’a primavera aragonesa, antimás d’os más emocionants. En ista XI edición d’as Chornadas por o Río Galligo s’ha enamplau o programa cuanto a anteriors edicions y s’han adhibiu bellas novedatz.

As actividatz prencipioron o pasau 20 d’abril con una marcha por a redolada de maitins. A tardi continó con una visita t’as arnas de l’apicultor Martín Rufas y bellas tastadas de vin, biera, chelaus, aceite y atros productos feitos en l’Alto Aragón, en a 5ena feria d’os liquidos sagraus d’a Mediterrania. O domingo, SEO – Birdlife,  fació un anillamiento d’aus t’aficionaus y amants d’a ornitolochía. Tamién bi habió una baixa popular d’o río y un puenting solidario. O lunes, Chapón y a suya cultura estioron os protagonistas, en una chornada a on que se fació una demostración de Kyudo-arco chaponés y una charradas sobre os emplegos de l’augua en ixe país.

Pero ye o martes o diya gran, quan as navatas y os navaters y navateras tornen a esnavesar o río Galligo, dende a placha de Morillo dica la de Biscarrués. En ista anyada, dos navaters “especials” son estaus convidaus a compartir o viache. Serán Luis Solana, president de l’asociación Río Aragón y firme luitador contra o recreiximiento de l’entibo de Yesa, y Francisco Fraguas, actor y guionista de teatro y televisión y con vinclos familiars en Morillo.

O proceso ta construyir as navatas se ha puesto viyer mientres totz istos diyas y continará dica o zaguer inte, quan s’empente a navata ta prencipiar a baixada. Pero tot lo proceso prencipió en a luna mingua de febrero quan se talloron os verdugos de sarguera que se fan servir t’anyudar os troncos d’os trampos d’as navatas. En total se’n replegoron 1500 que servirán t’as navatas d’as baixadas d’a Galliguera, Sobrarbe y Echo y que se pilloron d’as orillas d’o río Ara.

As chornadas tienen como obchectivos mantener a recuperación d’una antiga tradición, sensibilizar a la población d’a redolada y de tot lo país d’as valors meyoambientals d’un río vivo, trobar un desembolique sostenible con o meyo natural y concienciar d’a importancia d’o patrimonio cultural y d’o río como ecosistema vivo.

Dimpués d’a baixada se ferá una chenta popular y una prochección d’o video “Nabateros y gancheros”. As chornadas rematarán o diya 27 con una cursa sobre plantas medicinals y una charrada sobre os emplegos d’a chordiga en Villalangua.

 

Una rispuesta a As navatas tornarán a baixar por o Galligo

  1. Pingback: As navatas tornarán a baixar por o Galligo | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.