As navatas tornarán a esnavesar o Galligo o cabo de semana

A baixada de navatas se fa por decena anyada. I baixarán dos navatas dende Morillo dica Santolaria

Imachen d'a baixada de 2010
Imachen d’a baixada de 2010

As navatas tornarán a baixar parti d’o Galligo o venient lunes. Por decena anyada a Coordinadora Biscarrués – Mallos de Riglos organiza a baixada de navatas en colaborando con l’Asociación de Navaters d’a Galliguera, l’asociación ‘Amigos de la Galliguera’ y bells concellos d’a redolada.

As navatas se serán costruyindo en as plachas de Morillo mientres os diyas 21 y 22, ta estar prestas t’o lunes a las 11:00 quan prencipiarán a suya baixada dica lo puent de fierro de Santolaria. Mientres istos diyas se ferán arrienda actividatz relacionadas con o meyo ambient, l’augua y a Galliguera.

O sabado prencipiará con a 4ª Cursa por a Galliguera, con un recorriu de quasi 20 kilometros. De tardis SEO/Birdlife presentará o concurso de fotografía “Río Gallego” y Juanjo López de Uralde, president d’a formación politica EQUO, ferá a charrada “Una visión ecolochica d’a ixuquera”.

O domingo rebute d’actividatz con un anillamiento d’aus, una visita t’as arnas d’un apicultor, un rafting solidario u un taller de queso. A las 18 en a plaza de Morillo, se ferá a 4ª “Feria d’os Liquidos Sagraus d’o Pirineu” a on que se podrán tastar biera, vin, miel, aceite, embutius… tot d’o país.

Ta Sant Chorche se ferá a la fin a baixada d’as navatas. Ista anyada baixarán dos navatas, una de tres trampos y una atra de dos. Antimás una nueva navatera se suma a la colla que leva baixando istas zaguers edicions. T’a baixada irán tamién navaters d’o Sobrarbe y d’Echo.

As chornadas continarán o diya 28 en Ayerbe. O herbodietista Manuel Roncero menará una cursa ta conoixer as plantas medicinals d’a ruta de l’augua dende as 10 d’o maitin. De meyodiyas se i ferá un socalce medicinal. Rematará os actos a charrada “As plantas medicinals y o cuerpo humano”.

Una rispuesta a As navatas tornarán a esnavesar o Galligo o cabo de semana

  1. Pingback: As navatas tornarán a esnavesar o Galligo o cabo de semana | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.