As oposicions de mayestros prencipiarán en a segunda metat de chunio

Se convocan 105 plazas de personal docent no universitario

Alfonso García Roldán (Foto: Cortes d'Aragón)

Alfonso García Roldán (Foto: Cortes d’Aragón)

O departamento d’Educación d’o Gubierno fació publica iste martes a convocatoria d’oposicions ta cubrir 105 plazas de personal docent no universitario. S’ufren 95 puesto t’o cuerpo de mayestros y 10 t’o d’inspectors. En o caso d’os mayestros, 40 son t’a especialidat d’Educación Infantil, 35 ta Anglés y 20 ta Educación Fisica.

O proceso de triga t’o cuerpo de mayestro se ferá meyant concurso-oposición y prencipiará en a segunda metat de chunio. As prebas d’anglés se ferán en Uesca, as d’Educación Infantil en Zaragoza y as d’Educación Fisica en Teruel. Qui quiera una plaza podrá presentar a suya solicitut dende o 10 dica 0 30 d’abril, incluyiu.

O director de Chestión de Personal d’o departamento d’Educación, Alfonso García Roldán ha explicau que en fase de concurso se valurarán, entre atros meritos, a formación academica y a experiencia docent previa. En a d’oposición se parará cuenta d’os conoiximientos especificos d’a especialidat, l’aptitut pedagochica y o dominio d’as tecnicas ta l’exercicio docent.

Ista fase traye novedatz. Penderá en dos prebas eliminatorias y se bi incluyirá un exercicio practico. A nota d’a oposición suposará dos tercios d’a puntuación total y caldrá aprebar-la ta poder sumar a nota d’a fase de concurso.

Iste procedimiento ye l’establiu en o Real Decreto 276/2007 de 23 de febrer por o que s’apreba o reglamento d’ingreso, aceso y adquisición de nuevas especialidatz en os cuerpos docents y que s’aplica por primer vegada en Aragón.

García Roldán ha sinyalau que con a convocatoria d’ista ufierta d’emplego publico se cumple con o compromís d’o departamento d’Educación de celebrar oposicions en 2013 ta alazetar a situación laboral d’istos docents, que se incorporarán a os suyo nuevos puestos de camín, en setiembre de 2013.

A ufierta ye a maxima que permite a tasa de reposición d’o 10% fixada por o Gubierno espanyol y t’o calculo suyo a consellería ha parau cuenta tanto d’as chubilacions producidas mientres 2011 como las de 2012 en totz os cuerpos. O proceso de triga t’o cuerpo d’inspectors se ferá d’agüerro.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.