Denuncian a violación de dreitos humans en Dajla, en o Sahara Occidental

Dificil situgación d'os saharauis en Dajla debant la impasibilidat d'a comunidat internacional

Dajla (RASD)

Dajla (RASD)

As organizacions de solidaridat con o Sahara han queriu denunciar a situgación de represión brutal que viven os saharauis en Dajla, l’antiga Villa Cisneros.

En os zaguers d’o mes de setiembre bi’n habió firmes barallas dentre os colonos marroquís, con l’emparo d’as fuerzas d’orden marroquies, contra os ciudadans saharauis.

Como conseqüencia d’istas barallas estioron asasinaus, dica agora, dos saharauis (Nayem Sheibeta, Maishan Mohammed Lamin) amás de muitos ferius, detencions arbitrarias y mals a la propiedat privada saharaui.

As autoridatz marroquís alimentoron os disturbios y, posteriorment, en constatar que a situgación se descontrolaba, dos batallons d’o muro estioron desplazaus ta Dajla ta dar emparo a la represión.

A policía ha dentrau violentament en viviendas particulars de familias saharuis, han furtau autors y han interrogau mesmo a chovens menors d’edat.

As asociacions aragonesas denuncian que en iste inte Dajla vive una situgación dramatica insostenible, un estau de sitio de facto en que a población civil ista privada d’os suyos dreitos alazetals, como a libertat de movimiento.

Dende as organizacions de solidaridat con o Pueblo Saharaui en Aragón, asinas como atras entidatz d’a sociedat civil, quieren denunciar a politica criminal y despreciable d’o Gubierno de Marruecos, no solament debant a la población saharaui inerme, si no a la comunidat internacional y a totz os democratas d’o mundo.

Tamién quieren solicitar mas que no nunca l’emparo de totz os democratas y convidamos a o Gubierno espanyol a salir d’o suyo silencio y alcompanyar a la sociedat civil espanyola en a esfensa d’o dreito d’autodeterminación d’o pueblo saharaui y os dreitos humans, dada a responsabilidat historica, politica y moral de l’estau espanyol en a nefasta descolonización d’o Sahara occidental.

Asinasmesmo, reclaman a os democratas la condena de l’actitut d’o gubierno francés de viedar y trafucar ta que l’abanico de competencias d’a MINURSO s’enample dica la vichilancia d’o cumplimient d’os dreitos humans en o Sahara Occidental.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.