As ovellas s’autodesparasitan

As ovellas seleccionan bells tipos de matas medicinals quan padexen parasitosis internas.

Autora: Lucía López Marco

En os zaguers tiempos s’ha observau una crecient preocupación por aminorar o consumo de farmacos en ganaderia y l’aparición de parasitos resistents a os antiparasitarios ha feito que s’escomencipien a buscar nuevos sistemas de luita contra istos. A medicina natural podria estar a respuesta.
Seguntes publica a pachina web  www.KSL.com, Juan Villalba, professor d’a Utah State University (U.S.A.), ye embrecau en un estudio endrezau a conseguir que a luita contra os parasitos a faigan as ovellas solencas, consumindo ciertos tipos de pasto.

Os treballos d’iste scientifico han dau un enfoque distinto a la solución d’as parasitosis, un d’os mayors problemas d’o ganau. Fa servir una zona de pasto en a que ye examinando a capacidat de ciertas matas con propiedatz medicinals ta matar parasitos internos d’os animals que las minchan.

O más intresant ye que son os propios animals parasitaus os que, instintivament, seleccionan as matas que amenistan. O prau experimental ye ixamenau d’alfalz y en bells puntos s’han ixamenau tamien as matas que quiere analizar o professor Villalba. Si se dixa libres a las ovellas con parasitos internos, pastan d’as redoladas an que l’alfalz ye mezclau con as atras species pratenses d’aición antiparasitaria. Y quan se troban millor tornan a pastar en a redolada que tien alfalz nomás „os animals deciden quan amenistan una prescripción“, comenta Villalba.

Por l’inte, istos que estudios, que ubren a posibilidat d’aminorar o gasto en antiparasitarios con tratamients naturals, se son reyalizando solo que con ovellas, pero ye previsto de prebar-los con atras species ganaderas, como lo vacuno, y con atras species forracheras diferents de l’alfalz.

Una rispuesta a As ovellas s’autodesparasitan

  1. Pingback: Ovelhas que se autodesparasitam

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.