As plantillas d’AUZSA y Tata unen fuerzas contra os despius

As treballadoras y treballadors d'as dos interpresas unen fuerzas en as suyas respectivas luitas y mantienen vagas y movilizacions

Foto: @bancadaurbana

Foto: @bancadaurbana

En a tarde d’ahiere se concentroron en Zaragoza un centenar de treballadors d’as interpresas AUZSA y Tata Hispano contra os despius. Todas dos plantillas han uniu fuerzas en as luitas que mantienen con as suyas respectivas interpresas. Asinas, mientres desplegaban una pancarta an que se pediba a readmisión d’os 153 forachitaus en AUZSA se sentiban consignas de chirmamiento entre os y as treballadoras y contra o zarre d’a factoría Tata que mete fin a 79 anyos d’intensa actividat.

Totz dos comités han recordau que se mantendrán firmes en a suya luita por salvar os puestos de treballo. ”Mantenemos a vaga con un seguimiento d’o 100% y con o calendario de reivindicacions”, ha sinyalau Javier Anadón, president d’o comité d’interpresa d’Autobuses Urbanos de Zaragoza (AUZ). “Somos totz en a carrera”, ha adhibiu Juan José García Salvador d’o comité de Tata Hispano, interpresa que “abandona a 287 familias”.

O quarteno día de vaga en o servicio d’autobuses urbanos de Zaragoza s’ha saldau de nuevas con un 100% de seguimiento en totz os turnos de taller y de conductors, seguntes os datos facilitaus por o comité de vaga. Un día mas han tornau a sinyalar que ni interpresa, ni Concello, ni SAMA no han comunicau con o comité por o que os atures continarán maitín, como ya yera anunciau, en a francha d’as 8.00 a las 17.00 horas. Amás, iste mesmo viernes, a las 9.00 horas, realizarán una concentración frent a o Concello, y participarán en o Pleno Municipal.

Entrega de 24.000 sinyaturas por a solución d’o conflicto en AUZSA

O comité d’interpresa d’AUZSA fació entrega ahiere, en o Rechistro d’o Concello, de mas de 24.000 sinyaturas de refirme a la millora d’o servicio d’autobús y por a solución d’o conflicto. As sinyaturas estioron replegadas en distintos puntos d’a ciudat a resultas de que a interpresa fese efectivos os despius que han provocau a vaga. As sinyaturas refirman un breu texto que versa: “Por un servicio publico de calidat. No a os retalles. No a os despius”.

Entremistanto a causa d’a falta de personal, a interpresa AUZ ya ha comunicau a las y os conductors que pa poder amprar o servicio d’as fiestas d’o Pilar, les va a obligar a treballar un de totz dos descansos semanals que coinciden con o cabo de semana d’o 5 y 6 d’octubre, y lo mesmo ocurrirá con o cabo de semana d’o 12 y 13.

En zagueras, o comite de vaga d’AUZSA ha confirmau a suya participación en a movilización d’iste sabado, día 28, convocau por Marea Ciudadana y secundada por quantas organizacions politicas y socials. A manifestación partirá a las 19.00 horas dende a plaza d’Aragón d’a capital y marchará contra os retalles en os servicios publicos.

Fuent: http://arainfo.org/2013/09/las-plantillas-de-auzsa-y-tata-unen-fuerzas-contra-los-despidos/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.