As prediccions de Blade Runner, trenta anyos dimpués

Huei fa trenta anyos que s'engueraba en as salas de cine iste film de sciencia-ficción de culto. A BBC repasa dica que punto s'han cumpliu bellas d'as prediccions que feba

O 25 de chunio de 1982, huei fa trenta anyos, s’engueraba en as salas de cine ‘Blade Runner‘, un d’os films de culto de diversas cheneracions. Iste film de sciencia-ficción suposó a consagración d’o suyo director, Ridley Scott, y ha estau influencia y un referent ta creyadors de cine, televisión, novela y chuegos.

‘Blade Runner’ ha estau fuertement aclamada, mas que mas ta abanzar en o planteyamiento de qüestions que han esdeveniu alazetals iste sieglo XXI, como a globalización, o cambeo climatico u a superpoblación. Por ixo huei a BBC replega en un articlo ‘As prediccions de Blade Runner que s’han cumpliu‘ y fa referencia a temas como nuevas luengas que se charran agora en Los Angeles, autos voladors u robots humanos. Tos femos contino un resumen.

Luengas que desafían l’anglés

En ‘Blade Runner’ se planteya o desafío d’a hechemonía de l’anglés en Los Angeles d’o 2019; en o film, i hai residents que charran un mezclallo de luengas europeas y de l’Asia Oriental; actualment, no s’ha plegau a una situación pareixida, pero a BBC remera que s’ha duplicau a cantidat de fablants d’o espanyol en ista ciudat entre 1980 y 2010. Y adhibe: ‘Os visionarios pronostican que bell día o chino mandarín será a luenga habitual t’os negocios a ran global.’

Y cita as declaracions d’o lingüista francés Claude Hagege, que dició en o 2009 a o diario The New York Times que l’hindi y o chino mandarín bell día substituirían a l’anglés.

Autos voladors

En o film de Ridley Scott son celebres as imachens d’autos volantes, como o que fa servir o protagonista, Rick Deckard, que interpreta Harrison Ford. ‘No cal decir que no i hai autos que vuelen’, diz a BBC, pero nos informa d’un prototipo desembolicau por a interpresa norteamericana Terrafugia, que puede estar de vez un vehíclo por tierra u por aire. Agora, o pre previsto que puede tener rondaría os 280.000 dolars; y ye poco probable que s’acabe cheneralizando…

Reconoixencia de l’iris

Os autos voladors son encara una fantasía, pero no l’escaneyo de l’iris, que en ‘Blade Runner’ s’emplega t’a reconoixencia d’os ‘replicants’, pero que en ‘Minority Report’, un film basau en un cuento de Philip K. Dick, se fa servir ta reconoixer a identidat d’os sers humanos. Hue o sistema de reconoixencia de l’iris s’emplega en aeropuertos y puntos de control de mugas.

Intelichencia artificial

En relación con os abances en intelichencia artificial, os ‘replicants’ de ‘Blade Runner’ pareixen sers humans sinteticos, y no robots, pero no tienen un comportamiento emocional normal; a preba Voight-Kampff sirve ta medir as respuestas empaticas, diz a BBC, que apunta que tien similitutz con as prebas que se fan ta medir os abances en intelichencia artificial. Pero no s’han creyau encara maquinas que combinen o comportamiento d’as personas, o luengache y a mecanica d’o cuerpo humano.

A colonización d’atras planetas

‘Blade Runner’ s’imachinó un mundo en que a mayoría d’os sers humanos heba fuyiu a colonias difuera d’a Tierra, mas placientes ta vivir, chestionadas por interpresas privadas.

Agora nos trobamos en un momento de disminución d’os fondos estatals t’a exploración espacial. Y as interpresas privadas son muito y muit luen de poder colonizar atras planetas. Pareixe dificil que en 2019 i haiga emigracions interplanetarias.

A moralidat d’os robots

Y o film planteya tamién una qüestión moral, constando en a sciencia-ficción: as conseqüencias de creyar vida intelichent a semellanza d’os sers humanos. ‘a qüestión que planteya o film ye si hemos d’atribuyir l’estatus de personas a las maquinas’, diz a doctora Anne Foerst, profesora asociada de sciencias informaticas en a Universidat de St. Bonaventure, en Nueva York. ‘Blade Runner’ fa servir a metafora d’a tecnolochía ta explicar por qué a sociedat decide que bells grupos de personas son acceptables y atros no.

Actualment se treballa en un sistema de control ta robots militars ‘ta asegurar que cumplen os regles d’o combate’, diz Allen, que tamién recuerda que s’investiga a creyación de robots ta cudiar chent mayor.

Fuent: http://www.vilaweb.cat/noticia/4023627/20120625/prediccions-blade-runner-trenta-anys.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.