As protestas de Rumanía forzan a dimisión d’o primer ministro

Emil Boc plega dimpués de semanas de manifestacións y revueltas en as carreras contra las retalladas

Emil Boc (Foto: en.wikipedia)

Seguntes publica o diario catalán Vilaweb, o primer ministro rumán, Emil Boc, ha presentau hué a dimisión, dimpués d’unas quantas semanas de protestas y manifestacións en a carrera contra la politica de retalladas que heba levau a cabo os suyo gubierno de centro-dreita. ‘Ha plegau l’inte d’as decisións politicas importants, y dende ista anvista, he preso a decisión de renunciar a o mandato en o gubierno’, ha declarau Boc en rematar a trobada de l’executivo. Ha explanicau que preneba la decisión ta resolver l’actual situación politica y social d’o país. A oposición heba pediu con insistencia l’abanzo d’as eslecions.

O  ministro d’Afers Extranchers, Teodor Baconschi, ya cesó fa solo que tres semanas a causa d’as protestas en a carrera. Baconschi s’heba referiu de traza despectiva a os manifestants, que dende prencipios d’o mes de chinero s’heban iu reunindo en la Piata Universitatii de Bucarest, un puesto con una gran valor simbolica porque ye an empecipió a revolución d’o 1989 que suposó a caita d’o rechimen de Nicolae Ceausescu.

Milars de manifestants han protestau istas zagueras semanas por as midas d’austeridat aprebadas por o gubierno, entre as qualas i hai a reducción d’o 25% d’o salario d’os funcionarios, un aumento de l’IVA d’o 19% a o 24%, y ta protestar contra a baixa calidat de vida y por a corrupción entre a clase politica.

Fuent: http://www.vilaweb.cat/noticia/3980635/20120206/protestes-romania-forcen-dimissio-primer-ministre.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.