As reaccions no se fan asperar contra o prochecto de lei de luengas d’o PP-PAR

CHA creye que a lei ye un golpe mortal contra as luengas, as asociacions d'o catalán refusan a "nueva" denominación

Manifestación por a igualdat d'as luengas en l'anyo 2009

Manifestación por a igualdat d’as luengas en l’anyo 2009

As reaccions no s’han feito asperar debant l’anuncio d’o prochecto de lei de luengas presentau por o PP-PAR, pero no han estau cheneralizadas ni masiau contundents. Os partius d’a oposición han criticau o texto presentau por a consellera de Cultura, Dolores Serrat.

Dende CHA a vocera en as Cortes Nieves Ibeas dició que ye un disprecio enta la ciudadanía aragonesa y más que más a os que charran aragonés y catalán. Remeró Ibeas tamién que en 1997 PAR y PP sinyoron un texto, chunto con a resta d’os partius parlamentarios, en que reconoixeban a realidat trilingüe d’o país. Tamién ha retau a o gubierno a contrimostrar que tien d’impositiva a lei de 2009, que ha dito que ye una lei “de dreitos y no d’obligacions” y s’ha lamentau que en o texto de l’estatuto reformau en 2007 no se mencione expresament l’aragonés y o catalán.

Tamién ha charrau d’o nuevo prochecto de lei o vocero d’IU Adolfo Barrena, qui ha manifestau que ye “un retalle ideolochico d’o PP refirmau por o PAR” y que ye un disprecio a la obligación de cumplir o que diz a Constitución espanyola y l’Estatuto d’Autonomía d’Aragón, asinas mesmo ha criticau o “centralismo espanyolista de que fa gala o gubierno d’o PP”.

O PSOE, por meyo d’o suyo vocero Javier Sada, tamién ha criticau o texto, y ha dito que ye una tapadera t’amagar os retalles u os problemas d’a minería. Sada ha esfendiu a lei encara en vigor y ha dito que meter-se a discutir o nombre d’as luengas ye como planteyar que lo que se charra en Mexico ye espanyol u no.

O partiu d’a cucha independentista, Puyalón, tamién ha feito publica una nota de prensa en que esplanica que creye una “irresponsabilidat d’eliminar a luenga aragonesa y catalana de qualsiquier estamento publico: amostranza, administración u comunicación” y desichen “l’aceptación, a normalización y a normalización d’o catalán y l’aragonés”.

Dende a Franja, as asociacions que triballan en esfensa d’o catalán han feito publico un comunicau refusando a “nueva” denominación ta la suya luenga que fa o texto d’a nueva lei y han tornau a insistir en a necesidat de lechislar l’emplego y amostranza de l’aragonés y o catalán ta guaranciar a pervivencia d’as luengas propias d’Aragón. “Os fablants d’aragonés y catalán”, dicen, “han de tenir guaranciaus por lei os dreitos lingüisticos alazetals”.

En o mundo asociativo de l’aragonés l’Asociación O Trango ha feito un clamamiento por un esprito constructivo entre a comunidad de fablants ta poder concarar o nuevo prochecto de lei “y actuar con más fuerza” contra la enrestida que se fa contra l’aragonés.

Dende a Universidat de Zaragoza, que queda excluyida d’o proceso de selección d’academicos d’a luenga, o titular de Filologia catalana, Javier Giralt, creye que no definir de que luengas se ye charrando ye un contrasentiu y ubre as puertas a que ixa Academia d’una luenga que no explicita, pueda veyer-se obligada a regular decenas de luengas en cada lugar d’Aragón.

L’asociación Apudepa, d’esfensa d’o patrimonio cultural denomina a la nueva ley como “ley contra las luengas”, en un comunicau aseguran que a luenga d’a Franja ye a mesma que en Valencia u Catalunya y creyen “inaceptable que una trifulca sobre o catalán acotole a la luenga aragonesa”. Tamién consideran un desproposito que una unica academia regule as dos luengas, y reclaman una ta l’aragonés y unatra ta o catalán armonizada con l’IEC y l’Academia Valencia de la Llengua.

O propio Institut d’Estudis Catalans tamién ha feito publica a suya posición sobre o nuevo prochecto de lei dicindo que a comunidat scientifica tien platero que en Aragón se charra catalán y criticando que se diga que se lis considere una “autoridat lingüistica externa porque l’IEC tien atribucions sobre o conchunto d’os territorios de luenga catalana, entre quals miembros bi’n ha chent d’a Franja”. Amás desiche que s’aplique un marco churidico que veile por o catalán y l’aragonés en Aragón, emplegando istas denominacions.

Una rispuesta a As reaccions no se fan asperar contra o prochecto de lei de luengas d’o PP-PAR

  1. Pingback: As reaccions no se fan asperar contra o prochecto de lei de luengas d’o PP-PAR | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.