As redoladas no replegarán más diners en l’anyo 2012

O gubierno remera que as redoladas s'amenistan pero que cal replanteyar-se funcions y financiación

O conseller de Politica Territorial y Interior d’o Gubierno, Antonio Suárez, ha asegurau “en 2012 os recursos economicos no van a creixer”. Por ixo, Suárez ha insistiu que as administracions locals habrán de treballar en prochectos de lechislatura, a quatro anyos vista, y no en prochectos a corto plazo.

O conseller ha afirmau que “soi esfendendo que as Administracions Locals sían lo mas alto posible, pero totz hemos de prebar d’estalviar”.

Son declaracions que Antonio Suárez ha realizau entre l’acto de constitución d’o Consello de Cooperación Comarcal en que han participau os presidents d’as 32 redoladas aragonesas.

Suárez, que ha estau alcompanyau por o conseller de Ficienda, Mario Garcés, ha afirmau que “aspero que en 2013 s’enciete o camín d’a recuperación y, una vez aconseguiu l’obchectivo d’estabilidat presupuestaria, podamos creixer economicament en as redoladas”. Por l’inte, ha adhibiu Suárez, “2012 será un anyo de transición que va a notar-se en os prochectos de todas as Administracions Locals”.

Por a suya parte, o consellero de Ficienda, Mario Garcés, ha remerau que “a situación economica ye grieu y todas as Administracions hemos de fer un esfuerzo de contención d’o gasto publico”. Garcés ha recordau que a economía creixerá como maximo un 0,5%. Por ixo, ha insistiu, “les hemos pediu que faigan ells o mesmo esfuerzo que somos fendo nusatros. Ye o momento de fer gastos eficients y estar austers”.

O titular de Ficienda ha recordau que as redoladas son una necesidat y responden a la identidat territorial aragonesa, encara que ha dito que “cal replanteyar-se as competencias que exercen y a suya financiación”

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.