As treballadoras de servicios de limpieza en vaga s’enzarran en a DGA

Dimpués de 24 días de vaga, treballadors y treballadoras han entrau en a siede d'a DGA en Zaragoza ta prebar d'embrecar-ie mas a o Gubierno d'Aragón

huelga-limpieza-salud

Foto: Patricia Escartín (AraInfo)

As y os treballadors d’os servicios de limpieza en centros sanitarios, que levan 24 días de vaga, han entrau hue miercols de maitins en o recinto d’a DGA d’o Paseu Mª Agustín en Zaragoza como protesta debant d’a falta d’implicación de l’executivo aragonés.

O suyo obchectivo yera embrecar a o Salut ta que mantenga una reunión con a interpresa, con a finalidat de que se resuelva o conflicto con una salida negociada a la problematica d’iste colectivo, ye decir o zarre d’a negociación d’o suyo convenio colectivo, en intrés de mantener a lo menos os dreitos laborals que tienen dica agora y no se les condene en caso contrario, por aplicación d’a reforma laboral d’o PP a una serie de perdas en totz os aspectos (economico, socials, horas de treballo, etc.).

En un primer momento han colapsau as puertas d’acceso a l’edificio ta forzar que belún de l’executivo aragonés recibise a las personas representants d’o comité de vaga ta tractar, por medio d’o dialogo, poder tornar a la mesa de negociación con as interpresas, que dende fa días no se dignan a charrar con ellas.

Dimpués d’uns intes de tensión entre as y os treballadors y a policía, se les ha permitiu pasar, decindo-les que serian recibius. O qual ha resultau estar una mentira, pus dimpués de mas de dos horas d’aspera, dengún no las ha recibidas alegando que no se i trobaba en ixos momentos belún con o poder de decisión ta poder charrar con ellas.

“Isto nos viene a demostrar a las claras o poco intrés por parte d’o Gubierno d’Aragón en buscar una salida a iste conflicto, que por una parte encara que ells s’evadan d’a situación, tienen muito que amagar por o que fa a las suyas pretensions y as d’as interpresas a las qualas licitan istos servicios externalizaus d’o Salut” denuncian dende o comité de vaga.

Finalment os y as integrants d’o comité de vaga han decidiu de solicitar por medio d’un escrito, que han pasau por o rechistro, una reunión a la mayor brevedat, y han demandau a las y os treballadors que se retirasen d’a concentración que manteneban encara en ixos momentos a las puertas de l’edificio Pignatelli.

Contina a vaga de fambre

Quatro personas -una emplegada de limpieza, un miembro de Marea Blanca y dos d’a Chunta de Personal- continan con a vaga de fambre encetada o pasau martes, 4 de chunio, en refirme a os y as treballadoras de limpieza y mantienen as suyas protestas en l’Hespital Clinico.

Antiparti, os sindicatos convocants de l’ature, CGT, OSTA, CCOO, UGT y CSIF, han programau una manifestación o domingo, 23 de chunio, a las 11.00 horas, en Zaragoza, entre a plaza d’Espanya y a Delegación d’o Gubierno en Aragón.

Fuent: http://arainfo.org/2013/06/las-trabajadoras-de-servicios-de-limpieza-en-huelga-se-encierran-en-la-dga/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.