As victimas de violencia de chenero podrán cambear de gufanya o cerrullo de casa suya

Gracias a l'alcuerdo alcanzau entre l'Instituto Aragonés d'a Muller (IAM) y a Unión de Cerrullers de Seguridat. O Departamento de Sanidat y l'IAM s'encargarán de publicitar y guaranciar a execución d'ista mida quan calga

Gracias a l’alcuerdo aconseguiu entre l’Instituto Aragonés d’a Muller (IAM) y a Unión de Cerrullers de Seguridat, aquellas victimas d’a violencia de chenero que residan en Aragón y poseyan una orden de protección, en a que s’especifique a necesidat de cambear o cerrullo d’o suyo domicilio, podrán fer-lo de forma totalment gratuita. Una mida que tien como obchectivo “amillorar a protección d’as mullers, asinas como d’os suyos fillos y fillas y personas dependients, victimas de violencia de chenero”, ha explicau Pilar Argente, directora de l’IAM.

Argente ha sinyalau que, en muitas ocasions, son muitas as mullers que no pueden cambear os cerrullos d’os suyos domicilios por falta de recursos economicos, motivo por o qual ha quiesto transmitir un agradeiximiento especial a la Unión de Cerrullers por sinyar iste convenio en tiempos de crisi. “Ista mida aduyará a las mullers con tasos recursos a sentir-se mas seguras en o suyo fogar dimpués d’a denuncia, un d’os momentos de mayor risque ta ellas”, ha matizau.

Agora, o Departamento de Sanidat y l’Instituto d’a Muller habrán de treballar de conchunta ta promocionar l’alcuerdo y fer-lo plegar a las victimas que l’amenistan. D’iste modo, o primer d’ells será l’encargau de publicitar ista nueva mida y o procedimiento a seguir, amás de difundir o material necesario y meter-lo en conoixencia d’os profesionals d’a chudicatura y atros profesionals embrecaus en a erradicación d’a violencia de chenero.

Antiparti, o departamento capitaniau por Argente será l’encargau de realizar distintas accions de difusión d’o servicio a traviés d’as asesorías que atienden a las mullers victimas de violencia, os servicios d’atención churidica y social de guardia permanent, o telefono 24 horas, en as accions de sensibilización y formación que faiga con personas que atienden en distintos ambitos a mullers victimas de violencia y por meyo d’as mesas tecnicas d’os procedimientos de coordinación comarcal t’a prevención y erradicación d’a violencia contra a muller en Aragón.

A Unión de Cerrullers s’ha comprometiu a atender totz os casos que se presenten a la mayor brevedat y a guaranciar l’adequada identificación personal de totz os profesionals que acudan a istos domicilios. Atro d’os puntos que fixa o convenio consiste en desembolicar un servicio d’información y atención telefonica a on se repleguen as solicitutz formuladas y dende o que se coordine o ninvio de profesionals d’UCES. Tot ixo, guardando siempre una estricta confidencialidat sobre os datos relativos a l’adreza, ubicación y a identificación d’as victimas y os suyos domicilios.

Fuent: http://www.aragon2.com/n-20217-702-victimas_violencia_genero_podran_cambiar_gratis_cerradura_casa

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.